Persuttaaneq nalunaarutigiuk
Københavnip Universitetiani lektori Ingrid Leth oqarpoq nunatsinni akuliunnissamut periarfissagissaarneq atorluarneqartariaqartoq nakuusertarnerup akiorniarnissaanut. Persuttaattunimmi tusaagaluarluni iliuuseqanngikkaanni iliuuseqartoqannginneranut pisooqataasutut inissisimalertoqartartoq oqarpoq.
Ilaqutariinni persuttaasoqartillugu nuliaasoq kisimi eqqugaaneq ajorpoq, meeqqammi namminneq pineqartutut misigisarpaat. Københavnimilu Universitetimi lektori Ingrid Leth oqarpoq inuit ilisimasariaqaraat persuttaannerit nalunaarutiginissaannut pisussaaffeqarlutik.
Nuliaasumut persuttaanerit meeqqanut persuttaanerupputtaaq, taamaammat persuttaattoqartillugu ilaqutariit innimiginissaat eqqarsaatigisariaqanngilaq, inuiaqatigiinnulli tunngasuummat eqqaamiut akuliuttariaqarput. Ingrid Leth oqarpoq.
Inunnillu isumaginnitseqarfimmiut suliassarimmassuk sunngitsuusaaginnartoqarsinnaanngilaq. Eqqaamiulli qanigisallu qisuariaqqaartuusaapput.
Kalaallit nunaanni innuttaasut imminnut qanittuararsuupput, inunnullu allanut tunngasut ilisimaneqartartorujussuupput, taamaammat ilisimasaq iliuuseqarfiginngikkaanni pisooqataasutut inissisimasoqalertarpoq. Suleqatigiillunilu aaqqiissutissanik nassaartoqarnissaq anguniarneqartariaqarpoq.
Ingrid Leth isumaqarpoq radiokut tvkullu eqqartuinerulernikkut illoqarfigisamilu eqqartuinerulernikkut iliuuseqartoqarsinnaasoq. Persuttaasimasorlu utoqqattissutissarsiussagaluarpat akuersaaginnartoqassanngitsoq oqarpoq.
Persuttaasoq aqqiinianngippat taava nuliaasup qimattariaqarpaa imaluunniit avatangiisit ilagiumajunnaarlugu. Isumaqarpungami inuit nipangersimaannartartut eqqarsarlutik: ila pitsaasukasaagaluarpoq, akuersaannginnermi misigitikkaanni aatsaat paasitinneqarsinnaavoq akuersaarneqarsinnaanngitsoq aapparmik persuttaasarneq. Ingrid Leth oqarpoq.
Ingrid Leth Københavnip Universitetiani lektoriusoq ippassaq Katuami ataatsimeersuarnermi oqalugiartinneqarpoq.
