Perorsaasunngortut 14-it ullumi allagartartaassapput

Ukiut pingasut affarlu ilinniareernerup kingorna marloriarlunilu sungiusarluni sulinermik misileereernerup kingorna ilinniartut tulluussimaaqisut, ilinniarsimanerminnut uppernarsaammik tunineqassasut, rektor Nuka Kleemann oqarpoq.

Perorsaasunngortut naammassissutitut soraarummeernermi agguaqatigiissillugu angusaat karakterskala nutaaq atorlugu 8,1-iuvoq. Karakteri pisinnaasaq annerpaaq 12-iuvoq.

Perorsaasut 300-t piffissami matumani amigaatigineqarneranni ilinniartut pikkorissut piginnaassaqarluartullu kalaallit inuiaqatigiit akornanni taamaalillutik sulilersussaasut, rektorip aamma oqaatigaa.

Rektor Nuka Kleemann, Ilulissani borgmesteri Anthon Frederiksen aamma ilinniartut siunnersuisooqatigiivisa siulittaasuat Else Marie Johansen oqalugiassapput.

Perorsaanermik ilinniarfimmi ullorsiorneq kaffillerfiussaaq unnugulu nereqatigiinnermik naggaserneqassalluni.