Perorsaasunngorlaat sulinissartik qilanaaraat

Ukiut pingasut sukataarlutik atuareerlutik perorsaasunngorlaat qiimaqisut allagartartaarnput. Allagartartaarneq erinarsornernik oqalugiarnernik qiimmassaanernillu imaqarpoq, ilaquttanit ilinniartitsisunit ilinniartitaanermullu tunngasunik suliaqartunit malinnaffigineqarluni.

- Ilinniarnerput uanga immikkuullarissutut taarusuppara. Naammasserlaaniit oqalugiartoq Arnannguaq Schmidt oqarpoq:

- Tassami ullumi uagut perorsaasutut naammassisugut uppernarsaratsigu ilumut maani nunatsinni nammineq oqaatsivut atorlugit ilinniartoqarsinnaasoq.

Naammassisut assut unamminartorsioreerlutik allagartartaarnertik nuannaarutigaat:

-Tulluusimaarnarpoq aamma nuanneq. Pilerinaq sulilernissaq. Ukiut pingasut unamminartoqarput aamma inuttut ineriartorneq annertooq aqqusaarpara. Peqqissiminanngeqaaq, Jonna Olsen 38-nik ukiulik oqarpoq.

Perorsaasutut sulileruni meeqqat sullitariumaakkani pingaartinneruai:

- Pingaarnerpaavoq sullitassat suleqatissallu. Aamma angajoqqaat qanimut naapittarnissaat oqaloqatigisarnissaallu, oqarpoq.

Angajoqqaat nuannaaqataanngitsuunngillat. Sussi Fleischer perorsaasunngorlaamut anaanaasoq panimmi atuarnerani sorsoqataasaraluaqaluni tulluusimaaqaaq:

-Pilluarnaq. Nuanneq. Misigisaq tupinnaqaaq. Nuannersorujussuarmik atuarneq ingerlavoq - aamma sorsoqataasarluta.

Najugaq qimannagu perorsaanermut ilinniarfik Nuummi inissisimasoq, Ilulissani persorsaasut ilinniarfiata ataaniippoq. Pisortallu Nuka Kleemannip perorsaasunngortut allagartartaavinik agguarpai:

- Matumuuna nalunaarutigissavara ullumi perorsaasutut allagartartaarpusi. Pilluaritsi.