Perorsaariaatsinik ilisimasakinneq paarlakaannermut pissutaaqataasarpoq
PIP-p siulittaasua Kaaliina Skifte ulloqeqqanut radioaviseqarnitsinni oqarpoq, perorsaasutut atorfiit 300-t maanna inuttaqanngitsut.
Nuummi meeqqerivimmi Timmiaaqqani pisortaq Juliane G. Dalager oqarpoq, akissarsiakinneq kisimi sulisussaaleqinermut peqqutaasanngitsoq, aammali perorsaariaatsinik ilisimasakinneq peqqutaasartoq. Timmiaaqqani perorsaasutut atorfiit arfineq-pingasuusut affaannaat maanna inuttaqarmata vikaarit taarseraattuarput.
- Meeqqerivimmiilluni titartaatitsinerinnaq ingerlanneqarneq ajorami. Meeqqat ineriartornerat takuneqarsinnaasussaapput, tassami meeqqerivimmut pulaaginnarluni meeqqap ineriartornera takuneqarsinnaanngilaq, tigussaannginnami. Taamaammat perorsaanermik ilisimasaqarnissaq pisariaqarpoq, Juliane G. Dalager erseqqissaavoq.
Meeqqerivimmi sulisut ilai ilinniarsimanngikkaluarlutik suliaminnut pikkorissuupput, ilinniarsimasulli pisariaqartinneqarnerullutik.
- Taartaasartoqartuarneq uatsinnuinnaanngitsoq aamma meeqqanut kipiluttunartarpoq. Ulluinnarni meeqqap soqutigisaa malillugu ingerlaniartarpugut, taamaammallu killiffia ingerlariaqqiffissaarutsikkaangatsigu meeqqamik unittoortitsisinnaasarluta, oqarpoq.
Taamaammat meeqqerivimmi sulisuussatilluni meeqqamik perorsaasinnaaneq ilikkarsimasariaqarsoraa.
- Meeqqap soqutiginninnera nungukkiartussanngippat meeqqap qanoq ililluni kaammattorneqarnissaa ilisimasariaqarpoq, Juliane G. Dalager oqarpoq.
Juliane G. Dalager aamma oqarpoq, meeqqat sunnertiasuusarmata, ilaasa kiinnat nutaat ullut tamaasa takusarnerat toqqissisimanngissutigisaraat, ilaasali soqutigineq ajoraat.