Perorsaanermi Ilinniarfimmi sulisunik ikilisaasoqalersoq
Atorfillit Kattuffiata Kalaallit Nunaanni Ilinniagartuut Kattuffiatalu aningaasarsianut isumaqatigiissutaasa nutarterneri ukioq manna atuutilersut sipaarniarnermut peqqutaasut Perorsaanermik Ilinniarfimmi rektori oqarpoq.
- Uppernarsarsinnaavara atorfinnik atorunnaarsitsisariaqalernikuugatta aningaasanik sipaarniarneq pissutigalugu, Nuka Kleemann KNR-imut oqarpoq.
- Ulluunerani meeqqanik sullissinermi qaammatini qulingiluani ikiortinngorniarneq.
- Isumaginninnermi ikiortitut ukiuni marlunni ilinniarneq.
- Isumaginninnermi qaammatini qulingiluani assistantinngorniarneq.
- Ukiuni pingasut affarlu perorsaasunngorniarneq.
Paasisat: SPS
Perorsaanermik Ilinniarfik 50-it missaanni sulisoqarpoq, rektorilu ukiuni 15-inngortuni sulinermini atorfinnik perngaammik ikilisaasussanngorpoq. Aningaasarsianut isumaqatigiissutit nutaat ukiumut 1,3 millionit koruuninik ilinniarfimmut naleqassasut naatsorsorsimagitsik rektori oqarpoq.
- Ilinniartitsisugut AK-p AC-llu, tassa ilinniagartuut kattuffianni, isumaqatigiissut naapertorlugu atorfillit, isumaqatigiissutaat januaarip aallaqqaataani atuutilersup nassatarisaanik uani ukiullu tulliani ukiumi aningaasartuuteqarfiginerulerpagut.
Aningaasaqarneq ataqatigiissappat sipaarniutit ukiup tullia ilanngullugu 2,6 millionit koruuninik naleqassasut ilanngullugu oqaatigaa.
- Naalakkersuisoqarfitsinnut aningaasanik malitsigisaannik qinnuteqartaraluarnikuuvugut, aammalu inerisaanermut allanut aningaasartuutissatsinnik qinnuteqartaraluarnikuulluta. Annerusumilli kinguneqarani, Nuka Kleemann oqarpoq, suliffinnillu ikilisaaneq uuma qaammatip ingerlanerani pissanerarlugu.
Atorfiilli suut qassillu oqaatiginissaat suli siusippallaarnerarpaa.
- Atorfiit qassit pineqarnersut maanna oqaatigisinnaanngikkallarpakka.