57-inik ukiulik, Ken Wyatt, Australiap inoqqaavini siullerpaalluni inatsisartunut taamaalilluni ilaasortanngorpoq. Nutaarsiassaqartitsivimmi BBC-mi tamanna allaaserineqarpoq.
Australiap kippasissuani Hasluckimi Ken Wyatt qinigaavoq, unammillertiminit taamaallaat 1000-inik amerlanerusunit qinerneqarluni.
Qinersisoqareermat Ken Wyatt uumissortunik qarasaasiakkut allaffigineqaqattaarpoq, tamannali sunnertiffigerusunngilaa.
- Australiap siumut isiginissaa pisariaqalerpoq, oqarpoq.
- Oqaluttuarisaanermik ilisimatusartut ukiut 50-it qaangiuppata oqaluttuarisinnaanngussavaat Australiap inoqqaavanik qinersinissaq Hasluckip sooq toqqarsimaneraa, taava paasineqassaaq nunap inoqqaajunera pissutigalugu qinigaanngitsunga, Hasluckimili soqutigisat unga ingerlalluarsinnaagikka upperalugu qinigaasunga, Ken Wyatt oqarpoq.