Pernaammik isumaqatigiissuteqarput
Atorfillit Kattuffiat, AK, Nunatsinnilu Naalakkersuisut isumaqatigiissummik oqaluttuarisaanermi siullerpaamik atsiorput.
Atorfillit Kattuffiata tjenestemandit kisiisa manna tikillugu isumaqatiginninniuttarsimagaluarpai, overenskomstili malillugu atorfinittussat ilanngullugit maanna isumaqatiginninniuttalissallugit. Isumaqatigiissut atsiorneqartoq 2009-p tungaanut atuutissaaq. Isumaqatigiissut siullermik siunnersortinut, immikkoortortanilu pisortanut nutaamik atorfinittussanut, atuutsinneqarpoq, illuatungeriilli assammillutik isumaqatigiissutigaat, isumaqatigiissut atorfinnut allanut atuuttussanngorlugu annertusineqassasoq. Tusagassiutinut nalunaarummi taama allassimavoq.
Isumaqatigiinniarnermi angusarineqartut, pisortani sulisut 600-t Atorfillit Kattuffiata isumaqatigiissutai malillugit malillugit atorfeqartut akissaataasa 4,5 procentimik qaffaavigineqarnissaanik kinguneqassaaq. Qitiusumit akissaatinik aalajangersaasarneq ingalaaminiarlugu, tapisianut inunnut ataasiakkaanut tunniunneqarsinnaasussanut, sumiiffinnilu ataasiakkaani isumaqatiginninniuteqartussanut immikkoortitsisoqarpoq. Taakkua saniatigut tjenestemandinut assingusumik atorfillit soraarnerussutisiassaat 0,7 procentimik qaffaavigineqarput.
Inunnik Isumaginninnerup iluani patajaallisaanissaq siunertaralugu inunnik isumaginninnermut siunnersortit akissaataasa immikkoortillugit iluarsiivigineqarnissaat Naalakkersuisut pingaartissimavaat. Isuma tamanna malillugu isumaqatigiinniarnermi, meeqqanut, inuusuttunut, innarluutilinnullu tunngassuteqartut pitsanngorsaavigineqarnissaat pingaartillugu siunertarineqarpoq, soorlu aamma nutserisut akissaataat aamma qaffaavigineqartut.
