Perlilersut piitsullu ikiliartunngillat
Naak nunarsuarmi aqutsisut nuimanerusut anguniaraluaraat nunarsuatsinni inuit perlilersut piitsullu ikinnerulernissaat, ineriartorneq killormut ingerlavoq.
Ullumikkut ulloq tassaavoq nunarsuaq tamakkerlugu inuussutissat ulluat, naalagaaffiillu peqatigiit inuussutissaqarnermut aqutsisoqarfianit naalagaaffiit siuttui kingumut eqqaasinneqaqqipput.
Naalagaaffiit Peqatigiinniit siullermik anguniarneqaraluarpoq 2015-imi inuit naammaginartumik inuussutissanik nerisaqarneq ajortut affaannanngortinnissaat. Tamanna nunanit 176-iusunit ukiut qulit matuma siornagut isumaqatigiissutigineqarpoq. Anguniagarli kusanartoq taanna iliuuseqarnermik malitseqartinneqarsimanngilaq. Tassami nunarsuatsinni inuit 850 millioninik amerlassusillit ullut tamaasa aqajaqqutik imaqanngitsut innaannartarput.
- Ingammik Afrikami nunat ilaanni ineriartorneq killup tungaanut ingerlavoq, taama oqarpoq Mads Løfwald, Afrikami nunat peqatigiit inuussutissat pillugit aqutsisoqarfianneersoq.
- Pineqartoq pillugu ataatsimeersuarnerit tulleriiaaginnaat pisaraluartut, anguniakkat kusanartut iliuuseqarnermik kinguneqartinneqarneq ajorput.
Ingammik Afrikap kujataani nunani piitsuni nunaateqarneq aningaasatigut ikiorserneqartariaqarpoq.
Nunaatillit naatitatik tunisinnaanngimmatigik ajornartorsiutaavoq. Tassami nunat killiit nunaateqarnikkut tunisassiatik illersorniarlugit tapiissuteqarfigisarpaat, tamatumalu kinguneranik Afrikamiut nunaatillit naatitatik tunisinnaaneq ajorpaat, akitigut unammillersinnaanngimmata. Nunaatillillu naatitatik tunisinnaanngikkunikkik piitsuuneruleraluttuinnassapput, Mads Løfwald oqarpoq.
