Perlilersupajussuaq Katuami takutinneqassaaq

Isiginnaartitsisartut pikkorissut pingasut isiginnaartitsissummik allanit allaanerusumik minutsini 45-ni aliikkusersuissapput.

Qanoruna iliorluni Kalaallit isiginnaartartut teqeqqumut avannarlerpaamut ingerlanniassavagut, sermersuarmut, pavunga nattorallit qullartoqatigalugit, qavunga sissamut palmerasaartumut, ikiariissitaanertullu piviusumi sinnattumilu ataatsikkoqqissaaq issariarnermi ataatsikkuulerluta qaqugorsuarmut? Angakkuarsaarnerinnartut ippoq. Taamaattorli susoqarpoq Teater 2 Tusinds-ip isiginnaagassiaa “Det Hungrende Bæst” (Perlilersupajussuaq) , Katuap tusagassiorfinnut nalunaarutaani taama allassimavoq. Akissutissarserusukkaannilu kulturikkut illorsuarmi isiginnaartitsineq orninneqarsinnaavoq, arfininngorpat nal. 20.30 aallartissaaq.

Lyberthip saniatigut aamma Christian Søgaard Peter Seligmannilu peqataapput. Ole Sørensen ilitsersuisuuvoq, isiginnaartitsissullu danskisuujunerusoq ingerlanneqassaaq.