Periutsit nutaat atorlugit pisuussutinik uumaatsunik, Nuup eqqaanni Qussuup nalaani, kuultinik kanngussannillu aammalu Nassuttuup eqqaani nikkileqassuseq misissorneqarnialerpoq.
Suleqatigiiffik geofysikimut tunngasunik suliaqartartoq, taaguuteqartoq, skyTeM ikiortigalugu, elektromagneti atorlugu aatsitassaqassuseq misissorneqarnialerpoq.
Nuna Minerals-imi geologi, Anders Lie misissuinissaq allaanerusoq pillugu ima oqarpoq.
- Una misissuissutissaq helikopterimiit 30 miiterisut portutigisumut silaannakkut nivingatillugu, elektromagneti atorlugu misissuissutigineqassaaq.
Innaallagiaq uunga ammalortorsuarmut aqqusaartassaaq, taamaasillunilu innaallagiaq atorlugu misissuineq ingerlanneqassalluni. Taamatut misissuinermi nunap pisuussutai uuttorneqarsinnaappjut, Anders Lie oqarpoq nangillunilu: - Tassa nunamut innaallagiaq ingerlaartikkaanni taamaasilluni nunap aamma nammineq innaallagiaqassusaa atorlugu, pisuussutinik uumaatsunik peqarnersoq paasaqartoqarsinnaavoq. Tassa saffiugassat suulluunniit ledningsevninik taaneqartartunik peqarluartarput, ujaaqqallu pisuussutinik akoqanngitsut ledningsevneqassuseqarneq ajorput, taamaasillugulu una atortorsuaq atorlugu, nunami uumaatsunik pisuussuseqqassuseq paasineqarsinnaavoq, Anders Lie oqarpoq nangillunilu:
- Uuma atortup nunap ilua 500 miiterisut ititigisoq misissorsinnaavaa, taamaammat pisuussutinik uumaatsinik soqartillugu, qilleriffissani eqqornerusumik paasissutissanik pissarsisoqarsinnaavoq, NunaMineralsimi geologi, Anders Lie, suleqatitsinnut oqarpoq. Misissuineq sapaatit akunneri arlalialunnguit qaangiuppata naammassineqassaaq.
