Peqquserluttut aningaasartuutigaat

Suliffeqarfiit pillugu paasissutissaatitit allattukkit. Immersugassaq atsioruk nassitsisumullu utertillugu taava suliffeqarfiit EUp inuussutissarsiortunut nalunaarsugaanut EU Business Registerimut ilanngutissaaq. Tamanna akeqanngilaq.

Ilumoornissaminut ila pitsaavallaangajappoq. Peqquserlunniarneruvormi Sulisitsisut Peqatigiiffiata GAp mianersorfigeqqusaa. Kalaallit suliffeqarfiutaani ikinnerpaamik ataaseq peqquserluttunut akuersisooreerpoq 22.000 koruunillu inulaarlugit akilertussanngorlugit.

Uukapaatitsiniutigineqartoq tassaavoq immersugassaq atsioriarlugu nassitsisumut fax-ikkut utertinneqartussaq. Europamili Danmarkimilu suliffeqarfiit arlallit takunngitsoortarsimavaat immersugassami naqqani mikisuaqqanik allassimammat nalunaarneq pissarsissutaanavianngitsoq taamaattoq akilernissaa pisussaaffigineqartoq.

Elektrikerit suliffeqarfiutaat Carl Lynge A/S Nuummeersoq siorna novembarimi immersuinermigut kukkuluttorpoq, maannalu suliffeqarfiit allat mianersoqquaat immersugassamik atsiukkamik fax-ikkut nassiusseqqunagit.

- Taamatut pisoqarnera uagut 22.000 koruuningajannik aningaasartuutigaarput arlaannilluunniit pissarsiffiginagu, Carl Lynge A/S-mi pisortaq Kitdlak´ Knudsen KNR-imut oqarpoq.

Carl Lynge A/S atortussanik assigiinngitsunik Europami tunisassiortunut toqqaannartumik pisiniartarpoq taamalu tuniniaasartut aningaasartuutigivallaartarnagit. Ippinnartoqartissimanngilaat Europami inuussutissarsiortut allassimaffianniilernissamut neqeroorfigitinneq. Allatullu ajornarmat 22.000 koruuningajaat akilersimavaat piaarnerpaamillu isumaqatigiissummit tunuarniarlutik nalunaarsimallutik.

- Akiliinngikkutta eqqartuussivitsigut malersortissinnaasimavugut immersugassaq nassiussarput inatsisitigut pituttuisuummat, Kitdlak´ Knudsen oqarpoq.

Taassuma GA assigalugu suliffeqarfiit allat mianersoqquai.

- Taamatullu pisaritittussagaanni pingaartorujussuuvoq isumaqatigiissummit tunuarniummik nassiussipallannissaq. Taamaasiunngikkaanni akisoorujussuusinnaavoq, Kitdlak´ Knudsen oqarpoq.

Danmarkimi suliffeqarfiit arlallit Car Lynge A/S-itulli peqquserluffigineqarsimasut, GA KNR-imut ilisimatitsivoq.