Peqquserluttarnermut akiuiniaqatigiiffik oqallisigissavaat

Anngiortumik akiliilluni peqquserluttarnerup akiuiniaqatigiiffiata, nunani tamani immikkoortortaqarfeqartup, Transparency Internationaip, Kalaallit Nunaani immikkoortortaqarfeqalernissaa suliniutigineqarpoq.

Anngiortumik akiliilluni peqquserluttarnermut akiuiniaqatigiiffik Transparency International, Kalaallit Nunaanni ukiut pingasut matuma siornatigut oqallisaangaatsiarpoq, taamanikkut Siumukkut naalakkersuisuutitaqarneranni, Hans Enoksen naalakkersuisut siulittaasuunerata nalaani, nunatsinni pissaanermik atornerluineq kammalaatinillu atorfinititsisarneq oqallissaaleruttormat.

Anngiortumik akiliilluni peqqusserluttarnerup akiuiniaqatigiiffianik Kalaallit Nunaanni immikkoortortamik pilersitsiniarneq iluatsinngitsoorpoq. Maannakkulli aallartitsiniarneq iluatsinnialerunarpoq.

Arlaannaannulluunniit attuumassuteqanngitsumik ilisimatuussutsikkut sulinissamut aningaasaliinissamut tapiissuteqarniartut ilaatigut tassaapput sulisitsisut peqatigiiffiat, SIK aamma Danmarkimi kattuffik Finansforbundet.

Inatsisiliarineqartuni sanngiiffigineqartut isiginiarneqassapput, peqquserluttuliorsinnaanissamut assingusunut tunngasortai isiginiarneqassallutik.

Isumasioqatigiinnissami aqagu aallartittussami anngiortumik akiliilluni peqqusserluttarnerup akiuiniaqatigiiffiata Transparancyp immikkoortortaqarfiata aqutsisua Jermyn Brook peqataassaaq, taanna peqquserluttartunik akiuniartunik suleqateqarpoq. Ileqqorissaarnissamut upalungaarsimanissamik qanoq sulisoqarsinnaanersoq ilaatigut sammissavaa.

Isumasioqatigiinnermi timmisartortitseqatigiiffiup Air Greenlandip pisortaanera Michael Binzer peqataassaaq, Kalaallit Nunaanni peqquserluttarnerup atuunnera saqqummiutissallugu.

Politikerit pissaanermik atornerluisarnerat kammalaatinillu atorfinititsisarnerat Michael Binzerip ukiut pingasut matuma siornatigut oqallisissianngorlugu saqqummiuppaa.

Apeqqut taanna sooq soqutinarseqqippa?

Pisortat ingerlataannik sanaartornerit, aatsitassarsiorfiliornerit uuliasiornerillu, nunarsuarmi peqquserluffiunerpaat ilagaat. Suliallu taakku pingasut Kalaallit Nunaata ineriartorneranut ilaasussaapput.

Peqquserluttuliornerit tassaannaanngillat Schweizimi aningaaserivinni aningaasat allanit pigineqalertarnerat.

Peqquserluttuliornertut naatsorsuutigineqanngitsut aamma peqquserluttuliornerusarput, soorlu tunissuteqarnikkut aliikkusersuinikkut, ikinngutit ikiornerisigut tunissuteqarnikkulluunniit.

Pisortat suliffeqarfiillu ileqqorissaarnissamut ulapalungaarsimanissamut aqutsisinaanerat isumasioqatigiinnermi saqqummiunneqartussanut ilaassapput.

Anngiortumik akiliilluni peqquserluttarnermik akiuiniaqatigiiffik, Transparancy International 1993-imi pilersinneqarpoq, nunanilu 90-ini immikkoortortaqarfeqarluni.