Peqqissutsimut naalakkersuisoq: Suliaq ingerlateqqinneqassaaq

- Qutsavigaakka aamma qularinngilara inuit taamatut nalaattaqarsimasut saqqummerniarnerminni imminnut annertuumik piumaffigalutit taamatut saqqummertarmata, taamaattumik nakuusorujussuartut inuttut isigivakka, oqariartuutaallu tusaatissatut tigullugit.

Taama oqarpoq Agathe Fontain. 141-Tasiorta, kinguaassiuutitigut atornerlunneqarsimasunut oqarasuaatitigut siunnersuiffiusartoq, maanna Namminersorlutik Oqartussanit aningaasaliiffigineqartarpoq.

Kinguaassiuutitigut atornerluisarneq pillugu suleqatigiissitaliaq oktoberip aallaqqaataani suliaminnik tunniussissapput, taassumallu kingorna iliusissanik tikkuusinissaa, naalakkersuisumit naatsorsuutigineqarpoq.

- Ilisimasallit tassunga tunngassunik aamma tunniussaqassapput soorunami. Iliusissanik siunnersuuteqassapput iliusissat qanoq ittut pitsaanerpaanersut nunatsinni ingerlatissallugit. Soorunami aamma taakku tunngavigalugit suliaqaqqinnissarput naatsorsuutigineqassaaq.

Paamiuni kinguaassiuutitigut atornerlunneqarsimasunut peqatigiiffimmi 'Kialaami' siulittaasoq, Isak Josenius Thorsen-ip pingaartillugu oqaatigaa, kinguaassiuutitigut atornerluisimasut pineqaatissinneqarsimasut inissiisarfimmiinerminni katsorneqartalertariaqartut.

Agathe Fontain pilersaaruteqarpoq.

- Takorluuivugut massakkuunerani kriminalforsorge sulinngiffeqareernerup kingorna naappikkusussavarput ataatsimeeqatigalugit taavalu qanoq iliuseqartoqarsinnaanera pineqaatissinneqareersimasut isersimatinneqarnerminni katsorsarneqarsinnaasunik tunngasunik oqaloqatigerusuppagut, tassuunakkut ikioqatigiilluta iliuseqarsinnaanerput qanoq ittuunertik oqaloqatigiinnikkut aamma pineqarsinnaammat, Agathe Fontain oqarpoq.

Suliniutigineqartut ilagaat 'barnehuset', tassa meeqqanik atornerluisoqarsimatillugu siornatigut assigiinngitsunukaqattaartinneqartarneri unitsillugu, meeqqap ornifissaa ataasiinanngortinneqarnissaa. Tassani ilaatigut iliusissat periusissallu ataatsimut suliarineqartalissapput.