Peqqissuseq pillugu siunniussat kinguarsarneqalerput
Inatsisartuni ataatsimiinneq ullumi eqqissisimasumik ingerlanneqaraluarsinnarluni, assortuunnertalimmik ingerlaleraluarpoq, immikkoortoq 39, Inatsisartut Peqqissutsimut ataatsimiisitaliaata siunnersuutaat aappassaaneerneqatussanngorlugu inatsisartuni eqqartorneqartussaagaluaq kinguartinneqarmat.
Peqqissutsimut ataatsimiisitaliami ilaasortat amerlanerussuteqartut, Inuunerittamik taallugu suliniuteqarnissamik siunnersuut, ilaatigut Siumumit ilaasortanit marluusunit, tassalu, Peqqissutsimut ataatsimiisitaliami siulittaasuusoq Jens Lars Fleischer aammalu ilaasortaq Vittus Mikaelsen, Atassummeersumillu Godmann Rasmussen-imit, Inuit Ataqatigiillu sinnerlugit ilaasortamit Juliane Henningsen-imit, aammalu Demokratineersup Astrid Fleischer Rex-ip, siunnersuut isumaqatigalugu atsioreersimagaluarpaat.
Taamaattorli inatsisartuni ilaasortat, siunnersuutip taamatut isikkoqartillugu akueriumanagu, inatsisartuni eqaartorneqarnerata appaassaaneerneqarnissaa kinguarteqquneqarpoq. Siunnersuutip akueriumaneqannginneranut patsisaasunut ilaavoq, siunnersuummut atatillugu aningaasaliissutissat. Siumut sinnerlugu inatsisartuni ilaasortaq Agnethe Davidsen ima oqarpoq: - Naalakkersuisoqarfinni assigiinngitsuni susassaqarfiit tassani pineqarput, qularnanngitsumillu taakkua aamma aningaasaliiffigineqareersimassallutik, taamaattumik marloqiusamik aningaasalersuilertoqannginnissaa anguniarlugu, piumasarivarput aningaasaqarnermut peqqinnissamullu ataatsimiisitaliat misissorluaqqaartariaqaraat. Siumut sinnerlugu inatsisartuni ilaasortaq Agnethe Davidsen taama oqarpoq. Inuit Ataqatigiit sinnerlugit peqqissutsimut ataatsimiisitaliami ilaasortaq Juliane Henningsen pakatsisimaqisoq ima oqarpoq: - Assorujussuaq eqqumiiginarpoq, taamatut pisoqarnera. Isumaliuutissiissummik kusanartumik ataatsimiisitaliaq saqqummiussereerpoq, tamatsinnik isumaqatigineqartumik. Aamma aningaasat qanorpiaq atorneqassanersut isumaqatigiissutigaagut, taamaammat paasisinnaanngilara sunarpiaq anguniarneqarnersoq. Ilumuussagaluarpat akuerineqartussaagaluarpoq, partiit tamarmik atsioqataareermata. Inatsisartuni Peqqissutsimut ataatsimiisitaliami IA sinnerlugu ilaasortaq Juliane Henningsen, taama oqarpoq. Inuiaqatigiit peqqissusaanik siuarsaaniarnermi ilaatigut suliniutissatut siunniunneqarsimapput, imerajuttunermik imminortoqartarneranik, aammalu meeqqanik ikkatilliisarnernik akiuiniarnissaq.
