Peqqissartut illussaat inissaqarnerulaassaaq
Peqqissartut illussaata sananeqarnissaa ukiortaartinnagu assallanneqaqqaassaaq. Taamaalilluni napparsimasut Danmarkimi katsorsarneqartut inissaqarnerulaalernissaat piviusunngussalluni.
Brønshøjimi Kalaallit peqqissartut Illuat 45-nik siniffeqarpoq 13-inik ilaneqarsinnaasunik.
Peqqissartut illussaat kisermaattarissanik 53-inik initaqassaaq immikkut perusuersartarfilinnik uffarfilinnillu, kiisalu qanigisaasunut siniffilerneqarsinnaasunik. Aammattaaq sisamanik immikkoortitsivissanik inissiaqassaaq, kræftertunut pingaartumik tunngatinne-qartussanik. Peqqissartut illuat Fælledparkenip eqqannguani sananeqassaaq Rigshospitalimit minutsini qulini pisummik anguneqarsinnaasumi.
- Napparsimasut ullutsinnut naleqquttumik qitiusumillu inissisimasumik inissaqartinneqarsinnaanngulernerat nuannertorujussuuvoq. Perulukkaanni ilungersunartumillu katsorsarneqaraanni nammineq inigisami eqqissisimasinnaanissamut ineqatigisamillu ilisarisimanngisamik isumaginninnani periarfissaqarnissaa naapertuilluarneruinnarpoq, Peqqissutsimut Naalakkersuisoq Agathe Fontain oqarpoq.
Peqqinnissaqarfik nammineq peqqissartunut illuliorani illuummik sivisuumik attartornissamik isumaqatigiissuteqarsimavoq. Peqqissartut illussaat nuuffigineqariaannanngorpat Brønshøjimi kalaallit peqqissartut illuat tunineqassaaq.
