Peqqissartut illuat Københavnimiittoq ullumi ammarneqassaaq

Peqqissartut illuat nutaaq kisermaattarissanik, immikkut anartarfeqarlutillu uffarfilinnik, ilaquttanullu innarfiliorfigineqarsinnaasunik, initaqarpoq. Peqqissutsimullu Naalakkersuisup pissutsit taamaalernerat nuannaarutigineqaqaaq.

- Perulunnartumik nappaateqaraani, matu matullugu kisimiissinnaanissaq pisariaqartinneqartarpoq. Peqqissartut kisermaattarissamik maanna inissaqartinneqalernerat, aamma ilaquttaminnik unnuisoqarsinnaanissamut periarfissaqalermata qujanarpoq, Peqqissutsimut Naalakkersuisoq tusagassiuutinut nalunaarummini taama allappoq.

Kalaallit peqqissartut illuat suliffeqarfittut Dronning Ingridip Peqqissaaviata ataani inissisimavoq, napparsimasunullu Danmarkimi katsorsarneqartunut akunniffissatut unnuisarfissatullu neqeroorutaalluni. Napparsimasut Danmarkimiikkallarnerminnut tunngasunik Peqqissartut Illuannit aamma siunnersorneqarlutillu ikiorneqartarput.

Peqqissartut illuata nutaap atoqqaarfissiorneqarnera, ilassinninnikkut ullumi malunnartinniarneqassaaq.