Peqqissaasut siunnersortit akissarsiakkaarujussuit

Peqqissaasut Danmarkimeersut siunnersortitut atorfillit sinerissami pilattaajartorlutik sulinerminni ulluni 14-nini 42.000 koruuninik akissarsiaqartinneqartartut, Sermitsiami ullumi saqqummersumi allaaserineqarpoq.

Taamaalillutik peqqissaasut peqqissaasunit nunaqavissunit, isumaqatigiissut malillugu akissarsiaqartinneqartunit akissarsiarissaannerujussuupput. Aamma limousinesygeplejerskitut taaneqartartunit, tassa Dannmarkimi taartaasutut ingerlatsivik aqqutigalugu atorfinitsinneqartartunit akissarsiakkaanerupput. Peqqissaasoq nunaqavissoq taamak sivisutigisumik sinerissami pilattaajartorluni sulisoq 16.000 koruunit missaannik akissarsiaqartarpoq.

Napparsimaviup pisortaata Jens Møller Jensenip siunnersortit qaffassissorujussuarmik akissarsiaqarnerat peqqissaasunik amigaateqarnermik tunngaveqartippaa.

-Nalinginnaasumik pilattaasartoqatigiit sinerissamut pilattaajartortissallugit ajornakusoorsinnaasarpoq, ulapittorujussooreeramik. Tamatuma saniatigut immikkut ilisimasallit pissarsiariniartariaqartarpagut. Taamaattumik Danmarkimit tikisitsinissaq pisariaqartinneqartarpoq, Jens Møller Jensen oqarpoq.

Dronning Ingridip napparsimavissuanit siunnersortit qanoq annertutigisumik atorneqarsimanersut oqaatigisinnaanngilaa, tamannali qaqutiguinnaq pisarnerarlugu. Sermitsiap paasisai malillugit ukioq manna ikinnerpaamik pingasoriarlutik siunnersortinik tikisitsisoqarsimavoq.