Peqqissaasut Nunatsinneersut amerlanerusariaqarput
Nunanit allaneersunik peqqinnissaqarfimmut sulisussarsiornissaq piffissaq kingulleq tusartarparput. Kisiaanni uanga isumaqarpunga sulisussarsiunnginnitsinni eqqaamasariaqaripput, sulisorerusunnerpaasagut tassaammata kalaallisut qallunaatulu oqalussinnaasut, Jesper Olesen oqarpoq.
Peqqinnissaqarfimmili pissutsit taama ajortiginerarlugit eqqartorneqartuartillugit soorunami, soorlu peqqissaasutut ilinniakkaminnik naammassinnittut maani suliffissarsiussallutik kajumiginavianngilaat. Taamaammat maani sulilissappata, atugarititassat pitsaasuunissaat neqeroorutigisinnaasariaqarpavut. Takusinnaavarpummi Nunatsinni peqqissaasutut naammassisut ilaat, nunani allani, minnerunngitsumik Danmarkimi suliffissarsiortartut. Namminerlu Nunatsinni ilinniartuutigeriikkatta maani suliffissarsiorusuttannginnerat alianartuuvoq, Jesper Olesen oqarpoq.
Peqqissaasunngorniat ilinniarfianni pisortap, Susanne Møllerip peqqissaasunngortut ilaat, suliffissaminni atugassarititaasut pitsaasuunissaat orniginartillugit, nunanut allanut suliffissarsiortarnerat ilumoornerarpaa, erseqqissarluguli naammassisut amerlanersaat Nunatsinniiginnartartut.
Jesper Olesen oqarpoq, Nunatsinni peqqissaasutut sulilerniartut aningaasarsiarissaartinneqarlutillu, suliffissaanni atugassarititaasut ataatsimut isigalugit pitsaasuusariaqartut. Taakkualu saniatigut ineqarniarnermut, meeqqat paarineqarnissaannut atuartinneqarnissaannullu tunngasut pitsaasuusariaqarput.
Tamakkualu tamarmik tassa peqqinnissaqarfimmi pisortat, sulisoqarniarnermut atatillugu ataatsimeersuarneranni eqqartorneqarput.
Kalaallit Nunaanni 1994-imili Peqqissaanermik Ilinniarfik aallartimmat, peqqissaasut 80-it ilinniarnerminnik naammassinnipput. Tassa Nunatsinni peqqissaasutut atorfiit 300-t qulerarterutaat.
