Peqqissaasut Kattuffiat nutaamik siulittaasortaarpoq

- Siulersuisoqarneq taavalu sinniisoqarneq nukittorsarneqassaaq. Peqqissaasut Kattuffiat inuiaqatigiinni saqqumilaarnerussaaq. Aningaasanik isumaqatigiinniarnerni taamaallaat kattuffik saqqumisassanngilaq, kisianni ulluinnarni kattuffik suunersoq, sumut atorneqarsinnaanersoq sumillu siunnersuisinnaanersoq saqquminerulissaaq, Peqqissaasut Kattuffianni siulittaasunngortoq Inuuti Fleicher oqarpoq.

Inuuti Fleischerip peqqinnissaqarfimmi misilittagaqarluarnini, Peqqissaasut Kattuffiani siulittaasuunermini atorluarniarpaa.

- Uannut piukkutilerlunga, ukiuni 20-t sinnerlugit peqqinnissaqarfimmi aqutsisutut sulereerlunga, siulittaasussarsiuleriarmata misiliivunga unamminartillugu. Aamma misilittakkakka aallaavigalugit Peqqissaasut Kattuffianni immikkooruteqarlunga sulisinnaaninnut takorluuillunga.

Kalaallit kikkuugaluartulluunniit akisussaaffimmik tigusisariaqartut Inuuti Fleischer isumaqarpoq.

- Peqqissaasut kattuffiata oqaluttuarisaanerani ukiuni 20-nngulersuni qallunaanik kattuffimmi siulittaasoqartarnikuuvugut. Kisianni piffissanngorsorivara aamma uagut kalaallit tamakkununnga nuimanerusunut atorfinnut saqqumilaarnerulertariaqartugut. Massakkummi namminersorpugut, 2010-miippugut. Namminneq piukkuttarluta misiliisarnissarpullu pingaartippara, aamma siunissaq ungasinnerusoq eqqarsaatigalugu, oqarpoq.

Inuuti Fleischer Aasiaat napparsimmaviani ukiuni 20-ni kingullerni pisortaavoq. 2013-ip tungaanut Peqqissaasut Karttuffianni siulittaasuussaaq.