Peqqissaasunut ikiortit amerliallapput
Kalaallit Nunatsinni peqqissaasunut ikiortit ippassaq amerliallapput, Peqqissaanermik ilinniarfimmi ilinniartut 16-it ilinniakkaminnik ippassaq naammassinnimmata.
apriilip 29-at 2008 05:48
Nalliuttorsiorpalaartumik katerisimaarnermi immikkoortortaqarfimmi pisortap, Lisa Ezekiassenip, soraarummeernermut uppernarsaatit tunniuppai. Peqqissaasunut ikiortinngortut 13-it peqataapput, naammassisut ilaat pingasut assigiinngitsunik peqquteqarlutik angerlareersimammata.
Peqqissaasunut ikiortinngortut Peqqissaanermut ilinniarfiup katerisimaartarfiani tamarmik assuarlutik qaaqqusat saallugit issiasut, naalakkersuisunut ilaasortanit Ark’alo Abelsenimit Siverth K. Heilmannimillu pilluaqquneqarlutik oqalugiarfigineqarput. Taakkua saniatigut naammasserlaat ilaqutaat nalliuttorsioqataasut erinarsoqatigiittarlutillu aliikkusersorneqarput naggataatigullu, pilersaarutini allassimasutuut; mamarsaakkanik sassaalliisoqarluni.
