Peqqinnissaqarfiup qarasaasiatigut ajutooqqanera qarasaasiatigut saassunneqarneranik pissuteqartoq

Peqqinnissaqarfik sapaatip akunnerata affaani teknikkikkut arlalinnik ajornartorsiuteqarpoq. Tamannalu qarasaasiatigut saassussisoqarneranik pissuteqartoq manna paasinarsivoq.
Qarasaasiatigut saassussineq peqqinnissaqarfimmut maajip aallartinneraniilli unammillernartoqartitsilerpoq. Peqqinnissaqarfimmut oqarasuaatikkut suli sianertoqarsinnaavoq. Assi © : KNR / Malik Brøns
Allattoq Signe Haahr Pedersen
maajip 18-at 2022 13:30
Nutserisoq Connie Fontain

Nakorsiarnissannut ullumimut piffissalerneqarsimaguit sivisuumik utaqqisarfimmiinnissat piareersimaffigissavat.

Peqqinnissaqarfiummi qarasaasiatigut atortui tamarmik ullumi aallaqqaataaneerneqarput, tamannalu pissutigalugu napparsimasut pillugit nalunaarsukkat takuneqarsinnaanatik.

Atortorissaarutit qameriarlugit ikeqqinneqassapput, peqqinnissaqarfiummi maajip aallartinneranit ajutooqqanera qarasaasiatigut saassunnermik pissuteqartoq maanna paasineqarpoq.

Naalakkersuisut tusagassiuutinut nalunaarummi paasissutissiipput.

AAMMA ATUARUK Peqqinnissaqarfik atortutigut ajutooqqavoq

- Teknikkikkut misissueqqissaarnermi paasineqarpoq maannamuugallartoq innuttaasut pillugit paasissutissat ajoquserneqarsimanngitsut aamma assilineqarsimanngitsut, kisianni suli qarasaasiatigut saassussinerup annertussusaa misissorneqarpoq.

Taamaakkaluartorli nakorsiartut naammagittartariaqarput.

- Utaqqinerit sivisunerunissaat naatsorsuutigineqartariaqarpoq, ilaallu piffissaliussanut orniguttut angerlartiinnarneqaratarsinnaapput. Saaffiginninnerilli nukinginnartut soorunami isumagineqassapput Peqqinnissaqarfillu sianerfigineqarsinnaavoq, Naalakkersuisut allapput.

Unioqqutitsilluni qarasaasianut isernerit

Qarasaasiatigut ajutooqqaneq ataasinngornermi maajip ulluisa qulingiluaanni aallartippoq.

Tassani nakorsamut allattarfik Doktor.gl ajutooqqasoq aamma peqqinnissaqarfimmut mailikkut allattoqarsinnaanngitsoq nalunaarutigineqarpoq.

Pisortat qarasaasiaannik allamik saassussisoqaqqammerpoq.

AAMMA ATUARUK Qarasaasiaanut pulalluni pinerliiniartoqarneratigut Namminersorlutik Oqartussat IT-kkut attaveqaasersugaanerat matuneqartoq

Qitiusumik aqutsisoqarfiup qarasaasiaani sillimaniarnikkut ajutoortoqarsimasoq marsip naanerani paasineqarpoq.

Tamanna pissutigalugu isumaginninnermi ikiorsiissutinik tunniussinissat ilaatigut kinguaattoorput.

Tamatuma saniatigut Inatsisartut upernaakkut ataatsimiinnissaat kinguartinneqarpoq, pisortallu nittartagaat amerlasuut ajutooqqallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq