Peqqinnissaqarfiup qarasaasiai ajorunnaartut
Peqqinnissaqarfiup qarasaasiaqarfii saassunneqarlutik atorsinnaajunnaaraluarput. Tamanna peqqinnissaqarfiup nittartagaata www.peqqik.gl-ip iserfigineqarsinnaajunnaarneranik kinguneqarpoq.
Nittartagaq doktor.gl iserfigineqarsinnaajunaarpoq peqqinnisssaqarfimmullu mailinik nassiussineq ajornarsilluni. Nuummi innuttaasut Dronning Ingridip napparsimmavianut ornigullutik nakorsaatinut allagartatik nutartertariaqalerpaat. Peqqinniassaqarfiullu iluani attaveqaqatigiinnermut kanali aamma eqqorneqarluni.
Qarasaasianullu attaviit maanna tamangajammik atorsinnaaleqqittut Peqqissutsimut Naalakkersuisoqarfimmi pisortaq Nike Berthelsen KNR-imut allappoq.
Peqqik.gl atorsinnaaleqqippoq kisianni piffissap ilaani ajortittarsinnaavoq. Peqqinnissaqarfimmut mailimik nassiussisoqarsinnaaleqqippoq. Maajilli arfineq-aappaaniit 20-ata tungaanut mailersimagaanni nassiuteqqinnissaat innersuussutigineqarpoq.
- Qarasaasiat katsorsaanermut atortut tamarmik atorsinnaaleqqipput, sinnerisalu aaqqissorneqarneri pilersaarutaasut malillugit ingerlanneqarlutik. Taamaammat qarasaasiatigut atortut annikitsut minillugit ullualuit ingerlanerani tamakkingajallutik atorsinnaalissapput, Nike Berthelsen allappoq.
Peqqinnissaqarfiup qarasaasianut atortuni taamaasa maajip 18-ani qamiterpai, aaqqissuussamik nakkutigineqarluartumillu aallarteqqinniarlugit.
Taamaaliornerlu peqqinnissaqarfimmi sulisut nakorsiat journaliinik pingasunngornermi ualikkut atuisinnaajunnaarallarneranik kinguneqarpoq. Tamannalu utaqqisitsivoq ataasiakkaallu utaqqilussinnarlutik.
- Saassussinerup kingunerisaanik nakorsiat misissortinnermi akissutaanik tusarnissamut pisarnermit sivisunerusumik utaqqisariaqartarsinnaassapput. Sapinngisamilli sivikinnerpaamik utaqqisoqartarnissaa anguniarlugu ilungersorluni sulisoqartoq, Nike Berthelsen allappoq.
Saassussinerit arlallit
Peqqinnissaqarfik kisimi qarasaasiatigut saassunneqanngilaq. Royal Greenland decembarimi ullunik arlalinnik sivisutigisumik qarasaasiatigut saassuneqarpoq.
Namminersorlutik Oqartussat marsimi aamma saassunneqarput, ilaatigut kommunit ataavartumik aningaasanik nuussisarnerat eqqorneqarluni.
Danskit illersornissamut misissueqqissaartarfiata qarasaasiatigut isumannaallisaanermut immikkoortortaqarfiani pisortaq Mark Fiedel KNR-imut oqarpoq, amerlassuutigut aningaasat paasissutissalluunniit piniarlugit saassussisoqartartoq.
Atortut atorsinnaajunnaarsinnarlugit, aningaasanik akiliisitsiniarluni imaluunniit paasissutissanik isertuussanik piniarluni qarasaasiatigut saassussisoqartarpoq taamaaliornerlu nittartakkat aqqutigalugit pisarluni.
-Nittartakkakkut sullissineq pitsaaquterpassuaqaraluartoq, qarasaasianik pinngitsuuisinnaajunnaarnerput saassunneqarnissamut sanngiiffiit annertunerulerneranik kinguneqarpoq, taamma oqarpoq.
Kikkut sumik siunertaqarlutik peqqinnissaqarfiup qarasaasiaqarfiinik saassussisimanersut, Peqqissutsimut Naalakkersuisoqarfimmi pisortap oqaatigisinnaannginnerarpaa.
