Peqqinnissaqarfitsinnut suliartornissamut pilerisaarisut
Taamaattumik peqqinnissaqarfimmi aqutsisut ilaat Danmarkiliarput Kalaallit Nunaannukarnissaannut pilerisaariartorlutik.
- Kalaallit Nunaanni Danmarkimilu peqqinnissaqarfiit assigiipput - maanili aamma allanik peqarpugut.
Aap, qallunaap peqqinnissaqarfimmi sulisup sullivimmi 3000 kilometerisut avannarpasitsigisumiittumi suna naatsorsuutigisinnaavaa?
Kalaallit Nunaanni Peqqinnissaqarfimmi nakorsat qullersaat Anne-Marie Ulrik aamma peqqissaasut pisortaat Ella Skifte maanna Danmarki angallavigaat tamanna oqaluttuariartorlugu.
Aarhusimi inuit 40-t tusarnaariarput
Aarhusimi Kalaallit Illuutaanni peqqinissaqarfipput annertunerusumik paasisaqarfiginiarlugu inuit 40-t tusarnaariarlutik takkussimapput.
- Angalanitta siunertaraa suliffitsinni atorfiit tamarluinnaasa maannakkorpiaq inuttalerneqarnissaat pisariaqarmat, peqqissaasut pisortaat Ella Skifte oqaluttuarpoq.
- Minnerpaamik ukiumut tulliuttumut ataatsimut sulisut naammattut isumaqatigiissuteqarfigineqarnissaat neriuutigaarput. Erseqqissunik kisitsisaateqanngilagut, neriuutigaarpulli sapinngisamik amerlasuut Kalaallit Nunaannukarnissaat.
Tamakkununnga ilaavoq nakorsanngorlaaq Ditte Jensen, misilitassanut nutaanut pilerisoq.
- Tusarpara imaassinnaasoq allaanerusunik aqqusaagaqarsinnasugut, Danmarkimiikkaluarutta aqqusaagassarinngisatsinnik. Soorlu suliakkerneqarnerulaartarluta. Taava eqqarsaannarpunga qallunaat napparsimmavianiinnermiit misigisassat amerlanerujussuussasut.
Inuusuttut nunatsinnukarusunneq ajorput
Qallunaat peqqinnissaqarfimmi sulisut inuusuttut nunatsinnukartinnissaat ajornarnerpaasarpoq, Ella Skifte oqaluttuarpoq.
- Ajornarnerpaagunarpoq ilaqutariit Kalaallit Nunaaliartinnissaat. Soorunami eqqarsartassapput meeqqat sumut pissappat, sumi atuarsinnaappat ulluinnarnilu inooqataanerat qanoq issava.
Imaassinnaavoq tamanna pillugu inuit misilittagaqarnerusut ataatsimiisitsinermut takkussimasut, soorlu pilattaasartoq Steffen Kramp soraarninngorsimagaluarluni kisianni:
- Soraarninngoraanni eqqarsarnarpoq; taavami? Taava nuannersuuvoq arlaanni sulillluni iluaqutaasinnaaneq misigisaqarlunilu, kisianni ullut tamaasaanngitsoq, qaammaterpassuunngitsoq - ukiunilu arlaliunngitsuni.
Inuusunnerit utoqqasaajunerusullu pisariaqartinneqarput
Naak nunatsinni peqqinnissaqarfiup inuusunnerit utoqqasaajunerusullu pisariaqartikkaluarai, pingaaruteqartupilussuuvoq nakorsanik peqqissaasunillu misilittagaqarluartunik nunatsinnukartitsisarnissaq, Ella Skifte oqarpoq.
- Assigiinngitsunik misilittangallit tassaapput avinngarusimasunukartissallugit piukkunnartut. Ilisimaneqanngilaq taamatut paasititsiniaalluni ataatsimiisitsisarnerit kinguneranik qassit nunatsinnukartarnersut. Kisianni nunatta iluani angalasarnerminni Ella Skiftep aamma nakorsat pisortaata Anne-Marie Ulrikkip misilittagaat unaavoq:
- Amerlaqaat pilerisaarilluni ataatsimiisitsisarnernut peqataasimasut naapittakkagut oqartartut:
Tassa aallariartitsissummik taamani tunivatsigut. Tassarpiaavoq aalajangerninnut tunngaviliunneqartoq.
Nunatsinni peqqinnissaqarfimmut suliartornissamut pilerisaarillutik angalasut katillugit illoqarfiit arfineq pingasut Danmarkimiittut tikissavaat.
