Peqqinnissaqarfimmi qullersat pillugu Poorski kingorna aalajangiisoqarumaarpoq

Tamanna Peqqinnissamut Naalakkersuisoqarfimmi qullersap Ann Birkekær Kjeldsenip Peqqissaasut Kattuffianni siulittaasumut ippassaq unnukkut nalunaarutigaa.

Taamaattoqarniariartoq peqqissaasut Nunatsinnilu nakorsat peqatigiiffiat quarsaartunnguanngorput.

Peqqissaasut Kattuffiat, Nakorsat peqatigiiffiat suliunnaarsinneqarallartullu pingasut ullorpaalussuarni qanoq pisoqarneranik tusagaqanngereermata Peqqissaasut Kattuffiani siulittaasoq Inuuti Fleischer utaqqiinnarsinnaajunaarmat Peqqinnissamut Naalakkersuisoqarfimmi qullersaq Ann Birkekær Kjeldsen iluatsillugu pissarsiarimmagu susoqarnersoq aperigamiuk ima akineqarpoq:

- Poorski sioqqullugu apeqqutima akineqarnissaa naatsorsuutigissanngikkinga nalunaarfigaanga. Inuuti Fleischer oqarpoq, suliallu suli ingerlanneqarnera kinguartoornermut pissutaatinneqartoq oqarfigineqarluni.

Ann Birkekær Kjeldsenimi sapaatip akunnerani uani suliap sumut killinnera paasinarsiumaartoq marsip 25-ianili oqaraluarpoq.

Taamaattoqarneralumi suliunnaarallartitaasut pingasunut kattuffinnilu ilaasortaasunut kipiluttunarineqarpoq:

- Isumaga malillugu sivisuallaaqaaq, tassami suliaq Peqqinnissaqarfimmut, sualummik sulisunut suliamullu attuumassutilinnut tamanut sunniutilerujussuvoq. Aamma suliffimmut nuannarinninnermut ajoqutaaqaaq, tassami apeqqutit ataqqeqatigiinneq susassareqatigiinnerullu aqqani akineqannginneri sivittortsillugu suliffigisap avaanngunarsiartuaarneranik kinguneqaannarmat.

Inuuti Fleischer oqarpoq, aamma Nunatsinni Nakorsat peqatigiiffianni ilaasortanut suliaq sunniinerlussimanersoq apeqqutigigatsigu ima akipput:

- Taama oqartariaqarsoraagut, ilaasortattami akornanni tamanna oqallisaaqaaq, tamarmillu suliaq avaanngunarnerarpaat.

Ole Lind, Nunatsinni Nakorsat peqatigiiffiani siulittaasunngorlaaq taama oqarpoq. Tassami siulittaasuugaluaq Jesper S. Olesen, Sermersuumi nakorsat qullersaattut sulineranut pisup akornutaasinnaanera pissutaalluni siulittaasuunerminiit tunuarnini ullumi nalunaarutigisimammagu.

Tassa Peqqinnissaqarfimmi qullersaasut pingasut maanna ulluni qulinngortuni suliunnaarallartinneqarsimasut tassaapput Kurt Nielsen, aqutsinermi qullersaasoq, Nakorsat qullersaat Carsten Thordal kiisalu Peqqissaasut qullersaat Lisbeth Lumby Rasmussen.

Taakku suliap paamaarunneqarnera aamma eqqumiigaat:

- Assorsuaq eqqumiippoq. Sapaatimmi akunnera kingullerli tusagaqareersimanissarput naatsorsuutigisimagaluarparput, nakorsat qullersaat Carsten Thordal Radioaviisimut taama oqareerlunilu suliaq pillugu nipangiussisimanissaa naalakkiutigineqarsimasoq oqaatigalugu. Pisulli nakorsat qullersaanut aamma sunniuteqaqisut oqaatigaa.

Poorskereerpat Naalakkersuisoqarfimmi qullersaq, Peqqinnissamullu Naalakkersuisoq suliaq pillugu ataatsimeeqatigiumaneqassasut Peqqissaasut Kattuffiata siulittaasuata oqaatigaattaaq.

Peqqinnissamut Naalakkersuisoqarfimmi qullersaasoq Ann Birkekær Kjeldsen oqaaseqartinniaraluaratsigu iluatsinngilarput.