Peqqinnissaqarfik tapiiffigineqalerunartoq
A.P. Møllerup nuliatalu, Chastine McKinney Møllerip, Aningaasaateqarfiat peqqinnissaqarfimmut millionilinnik tunissuteqarnialinnguatsiarpoq, tamanna Sermitsiap paasivaa.
Aningaasaateqarfiup allattoqarfiata nammineq tamanna oqaaseqarfigiumanngilaa, Namminersornerullutilli Oqartussanut innersuussilluni. Peqqinnissamulli Pisortaqarfimmi pisortaq Søren Rendal oqaaseqarumavallaanngilaq.
– Oqaannarsinnaavunga suliniutinut assigiinngitsunut tapiiffigineqarnissamik aningaasaateqarfiit arlallit attaveqarfigigivut, taamalu aamma A.P. Møllerip aningaasaateqarfia, Søren Rendal oqarpoq. Aamma oqaaseqarfigiumanngilaa peqqinnissaqqarfimmi sammisaqarfiit suut tunissutinik iluaqutissinneqassanersut.
Aningaasaateqarfik arlaleriarluni annertuunik tunissuteqartarsimavoq, assersuutigalugu Københavnimi Operahusip nutaap 2004-mi sananeqarneranut atatillugu aamma Illu Atlantikup 2003-mi pilersinneqarneranut atatillugu.
Aningaasaateqarfiup pisortaa, Ove Hornby, Nuummut februaarimi tikeraarpoq.
