Peqqinnissaqarfik aningaasaataaruppoq

Peqqinnissaqarfimmi aningaasartuutit amerliartuinnartut matussuserniarlugit 27 millionit koruuninik ilassutissatut aningaasaliisoqarnissaa peqqinnissamut naalakkersuisup Agathe Fontainip aningaasaqarnermut ataatsimiititaliamut qinnutigaa.
Allattoq Mads Lynge
decembarip 16-at 2010 16:17

Agathe Fontainip isumasioqateqarnissaa pillugu aningaasaqarnermut ataatsimiititaliaq aggersaavoq.

Ilassutissatut aningaasaliinissaq pillugu qinnuteqaammi immikkoortut sisamat Agathe Fontainip innersuussutigai:

Immikkut ilisimasallit angalanissaannut kræftertullu Dronning Ingridip Napparsimmavissuani katsorsarneqarsinnaanissaat pillugu 5 millionit koruuninik aningaasaliisoqassasoq.

Napparsimasut nunani allani katsorsarneqarsinnaanissaannut 5 millionit koruuninik aningaasaliisoqassasoq.

Napparsimasunik angallassinissamut akissarsianullu 10 millionit koruuninik aningaasaliisoqassasoq. Peqqinnissaqarfiit assigiinngitsut nakorsaatissaat tassani ilaatinneqarlutik.

Taamatullu aamma qarasaasialerinermut tunngasunut nakorsanullu taartaagallartunut aningaasartuutissanut 7 millionit koruuninik aningaasaliisoqassasoq.

Agathe Fontain Aningaasaqarnermut ataatsimiititaliamik ataasinngornermi decembarip 20-ani isumasioqateqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq