Peqqinnissaqarfik 15 millionit koruuninik amigartoorpoq

Aningaasaqarnermut Ataatsimiititaliaq 15 millionit koruuninik aningasaliissuteqarpoq. Taakku ima agguataarneqarput; napparsimasut nunani allani katsorsartinnerannut 7 millionit koruunit, 3 millionit Dronning Ingridip Napparsimmavissuanut, 2,5 millionit koruunit napparsimasut angallanneqartarnerannut taavalu 5 millionit koruunit Nuna tamakkerlugu  Nakorsaaserivimmut.

Immikkut aningaasaliissutit ilai ikinnerit, 2,8 millionit koruunit missaat, qinnuteqaat naapertorlugu, pissuteqarput, utoqqaat bilitsiisa akikillisaaffigineqarnissaraluannit Air Greenland 2010-p naanerani taamaatitsiinnarmat.

Aningaasalli suminngaannit pissappat?  Naalakkersuisunit siunnersuutigineqarpoq, taakku ingerlatsinermut aningaasartuutissanit sillimmatinit tiguneqassasut, ilamerngi Aningaasaqarnermut Naalakkersuisoqarfiup missingersuutaaniit, sulilu amerlanerusut Nunatta Karsiata tigoriaannaataanit. Taamaalilluni Nunatta Karsiata 2011-mut amigartoorutai 4,33 millionit koruuninik ilaneqassapput.

Dronning Ingridip Napparsimmavissua 2010-mi naatsorsuutigineqartumit 7 millionit koruuninik atuinerusimavoq. Ukioq mannalu atuinerunissaq 3 millionit koruunit missaanissangatinneqarmat, aningaasaliissutit 4,5 millionit koruuninik amerlineqarput.

Pisariaqartitsineq taamaalilluni 15 millionit koruuninngorpoq. Tamannalu ajunngitsuinnaanngitsoq, Aningasaqarnermut Ataatsimiititaliamit akuersisimasumit nalunaarutigineqarpoq, tassali qinnuteqaatip akuerineqarnissaa pinngitsoorneqarsinnaasimanngilaq, allamimmi periarfissaqanngimmat.

Peqqinnissaqarfimmi utaqqisut ikilisarniarlugit Naalakkersuisut 10 millionit koruuninik ullut 14-iinnaat matuma siorna aningaasaliipput.