Peqqinnissaqarfiit allannguuteqassanngillat

Nunatsinni illoqarfinni Peqqinnissaqarfiit tamarmik allanngoratik ingerlaannassapput.

-Peqqinnissaqarfiup nutaamik aaqqissuuteqqinnissaanut, aaqqissuussinermi iluarsiivigineqartussatut suut innersuussutiginerivut Peqqinnissamut Pisortaqarfimmi nalunaarusiorpavut, Peqqinnissamut Pisortaqarfimmi pisortaaneq, Søren Rindahl, ulloqeqqanut nutaarsiassani oqarpoq.

Nalunaarusiaq, sapaatip akunnerata uuma siuliani naammassineqartoq, allamik siuleqanngilaq. Taannalu nalunaarusiaq Inatsisartuni ilaasortanut marsimi ataatsimiinnermi saqqummiunneqassaaq.

- Kalaallit Nunaanni nakorsat atorfiinik ikilisaanissamik isumaqanngilluinnarpugut, Peqqinnissaqarfiulli ataani ajornartorsiuterujussuit illuatungaatigut qanoq iliuuseqarfigiumavagut. Ajornartorsiutit annersaraat sulisunik naammattunik atorfinitsitsisinnaannginnerput, Søren Rindahl nassuiaavoq.

Nakorsanik Peqqissaasunillu amigaateqarnerup saniasigut Peqqinnissaqarfimmi allarpassuit atorfiit aamma inuttassaqartinneqanngillat.

-Nalunaarut Inatsisartut akuerippassuk taava aatsaat nutaamik aaqqisuussinissamik siunnersuut suliarilissavarput taannalu kommuninut, Katuffinnut sumiiffinnilu kommunini politikkikkut qinikkanut tusarniaassutigineqassaq, taama naggasiivoq Søren Rindahl.