Peqqinnissaq pillugu ilisimasat angerlaappaat
Nunatsinni sukkorneq, aseruuttoortarnerit nunatsinnilu peqqinnissaqarfiup aaqqissuussaaneranik misissuinerit, Fairbanks-imi ataatsimeersuarnermi sammineqartut ilagaat.
Aamma tarnikkut nappaatit eqqartorneqarmata Nunatsinni suliniutit Canadamiunut Amerikamiunullu sanilliullugit siuarsimanerunerisa malunnarneri nakorsap Gert Mulvad-ip oqaluttuarai.
- Maani Nuummi Dronning Ingrid-p Napparsimmavissuani tarnikkut nappaatillit immikkoortortaqarfeqarput, illoqarfiillu sinnerini sulisut tarnikkut nappaatinik katsorsaasinnaasunik peqartiterlutik. Periarfissaq taanna nunatsinniittoq Canadamut Alaskamullu naleqqiullugu pitsaaneroqisoq malunnarpoq, Gert Mulvad oqarpoq.
Aamma issittumi peqqissutsimut tunngasumik misissuisarnerit assersuunneqarmata Kalaallit Nunaanni ilorraap tungaanut ingerlaneq paasinarnerulerpoq.
- Ataatsimeersuartoqarnerani nakorsat inuusuttut Nuummi nakorsiartarfimmeersut misissuisimanerisa inerneri aamma saqqummiussuunneqarput. Tamannalumi pingaaruteqaqaaq, tassami misissuinerit taamaattut katsorsaanerup siunissami qanoq isikkoqarnissaanut tikkuussisuusarmata, Gert Mulvad taama oqarpoq.
- Uagut nakorsatut sulinitsinni paasisat nutaanerpaat aallaavigiuarpavut. Nakorsaatimmi nutaat saqqumertuarput, nappaatinillu katsorsaariaatsit nutaat pilersinneqartuartarlutik. Pissutsimmi tamakku malinnaaffigilluanngikkutsigit katsorsaariaaseq pitsaanerpaaq angusinnaanngilarput, Gert Mulvad taama naggasiivoq.
