Peqqinnissamut naalakkersuisunngorlaap corona pillugu oqaaseqarsimanini allanngortikkaa
![Anna Wangenheim ny naalakkersuisoq for sundhed. Anna Wangenheim ny naalakkersuisoq for sundhed.](/sites/default/files/styles/image_934x467/public/article_images/anna_wangenheim.png?itok=BVVpghBL)
Qaammatit sisamat matuma siorna nunarsuaq tamakkerlugu tunillaassuuttoqanngilaq, coronavirusilu Kinami ajornartorsiutaasutut suli oqallisigineqarluni.
Januaarip ulluisa 29-anni tunillatsissimasutut uppernarsarneqartut 6.166-iupput, Demokraatiniillu Anna Wangenheim ”nutaarsiassatigut inoqatinullu attaveqaatitigut coronavirus pillugu uippallertoqarnerarlugu” tusagassiuutinut nalunaaruteqarpoq.
Piffissalli taassuma kingorna pisoqarsimaqaaq, peqqissutsimullu naalakkersuisunngorlaap Anna Wangenheimip oqaaseqaatigisimasani ullumikkut atugarerusunngilai.
- Naamik, soorunami ullumikkut taama oqarnianngilanga, kisianni eqqarsarpunga virus pillugu uippallernermik pinaveersaartitsisoqarsinnaagaluartoq, Anna Wangenheim allaffittaamini suli imaqanngitsumit oqarpoq.
AAMMA ATUARUK Ataatsimut isigalugu: Naalakkersuisut nutaat aaku
Anna Wangenheimip oqaaserisimasai ima ilaqarput: Takorloortigu nunatsinni qanoq kinguneqartitsisoqarsinnaagaluartoq kinguaassiutitigut nappaateqartarnerup nalinginnaassumillu nuffasernernerup kingunerisaanik katsorsartittarnerit coronavirusitulli nittarsaanneqartartuuguni, coronavirus nunatsinni peqqinnissatsinnut innarliisinnaanera assersuutigalugu kinguaassiutitigut nappaatinit annikinnerujussuuvoq”.
Taassuma oqaaseqaatigisai inuiaqatigiinnit qassiiusunit Anna Wangenheimimut apeqqusiititsipput, namminerli oqariartuutigisani kukkusumik tiguneqarsorai.
- Taama saqqummernera inuiaqatigiinnilu taama aalassatsitsiginera ajuusaarnarpoq, uippallertoqannginnissaanik oqariartuuteqarniaraluarpunga, Anna Wangenheim oqarpoq.
Nunatta qanoq iliuuseqarneranut allannguinngitsoq
37-nik ukiullip, Anna Wangenheimip Martha Abelsen (S) taarserlugu tallimanngormat peqqissutsimut naalakkersuisunngorpoq. Naalli Wangenheim coronavirusip ilungersunarneranut apeqqusiisimagaluartoq tamanna kalaallit peqqinnissaqarfiisa coronavirusimut atatillugu siunissami suliaqarneranut tamanna allannguinavianngilaq.
- Naamik, allannguinavianngilaq. Pissutsinik isumaginninneq ajunngitsuusoq isumaqarpunga, taamaammat tunillaassortunik nappaalanersuaqarneranut ataatsimiititaliarsuup innersuussutigisaanut upperinnilluinnarpunga, Naalakkersuisullu siulittaasuata oqaaseqaatigisaanut tatiginnilluinnarlunga, Anna Wangenheim oqarpoq.
AAMMA ATUARUK Niels Thomsen politikkimit tunuarpoq
Peqqissutsimut naalakkersuisunngorlaaq peqqissaasutut ilinniarsimasuuvoq, taannalu 2018-imi qinigassanngortinnikuullugu. Qinersinermili qinigaanngilaq, Inatsisartuni sinniisutut 2019-imi septembarimi iserluni.
Taanna Niels Thomsenip, Demokraatit siulittaasorisimasaata politikkimit allanngortitassaanngitsumik tunuarneratigut aalajangersimasumik ilaasortanngorpoq.