Peqqinnissamut ministeri aperineqalerpoq

Peqqinnissamut Ministeri apeqquteqarfigissavarput, taama Folketingimi Peqqinnissamut ataatsimiititaliami siulittaasoq, Birthe Skourup ullumi Thulemi sulisuusimasut, qinngornernillu navianartunik eqqungaasimasut peqatigiiffianit sassarfigitereernermi kingorna oqarpoq.

Peqqinnissamut ministeri saaffiginnissutigineqartut akissagai piumasaqarfigissavarput, Peqqinnissamilu ataatsimiitsitaliamiit pisinnaatitaanerput aallaavigalugu saniatigut allanik apeqquteqassaagut, suliamut atatillugu erseqqissarneqarsinnaasut akineqaqqullugit, aamma Illersornissamut ministereqarfimmut tunngasunik apeqqutinik ilanngusilluta apeqquteqassaagut, Birthe Skourup oqarpoq, nangillunilu

- Suliaq una ajornakusoortuuvoq ukiorpassuarnilu ingerlasimalluni, sassartullu oqariartuutiminnik pingaartitsisut malugisinnaavarput, tassami Risø pillugu nalunaarusiaq isornartorsiormassuk, taavalu siunissami assersuutigalugu peqqarniisaarniarnerup kingunerisaanik qinngornernik navianartunik migutsitisoqassagaluarpat, qanoq upalungaarsimanissamut sillimaniarnermullu piareeqqasoqartiginersoq apeqqusermassuk, Birthe Skourup oqarpoq.

Taanna aperineqarami Risø pillugu nalunaarusiaq nammineq qanoq isumaqarfigineraa ima akivoq

- Plutoniummip saniatigut allanik qinngornernik navianartunik peqarsimassappat paasineqarpatalu, taakkulu Risø pillugu nalunaarusiami ilanngunneqanngimmata, tupingissanngilara isornartorsiorneqarpat. Birthe Skourup oqarpoq.

Thulemi sulisuusimasut, qinngornernillu navianartunik eqqungaasimasut peqatigiiffiata siulittaasua Jens Zinglersen, Peqqinnissamut ataatsimiitaliamit tingulluarneqarsimallutik oqarpoq, maannalu apeqqutitit ministerimut anngunneqassanersut eqqumaffiginiarpaat.