Peqqinnissamut aqutsisoqarfiup 172 millionit koruunit corona pillugu qaammarsaanermut atorai

Peqqinnissamut aqutsisoqarfiup coronap nunarsuaq tamakkerlugu tuniluutilernerani innuttaasunut corona pillugu qaammarsaanissamut aningaasat atorpai.

Aqutsisoqarfiup corona pillugu 2020-mit 2021-mi septembarip ulluisa 28-annut qaammarsaanermut katillugit 172 millionit koruunit atorsimagai maanna takuneqarsinnaavoq.

Tamanna DR-ip allagaatinik takunnissinnaaffigisaani allassimavoq.

Peqqinnissamut aqutsisoqarfiup attaveqaqatigiinnermut pisortaata, Eva Tolstrup Zieglerip aningaasarpassuusut DR-imut nassuerutigaa.

Tamannalu Peqqinnissamut aqutsisoqarfiup paasissutissiinissamik suliaqarnerani oqaluttuarisaanermi annerpaasoq taassuma aamma maluginiarpaa.

- 170 millionit koruunimmi immikkoortillugit aningaasarpassuupput, tamannali nuna tamakkerlugu ukiuni marlunngulersuni suliniuteqangaatsiarnertut aamma isigineqassaaq, Eva Tolstrup Ziegler DR-imut oqarpoq.

AAMMA ATUARUK Danmarkimi peqqissutsimut aqutsisoqarfimmiit: Meeqqat 12-iniit 15-inut ukiullit neqeroorfigineqassasut

172 millionit koruunit annerpaartaat tusagassiorfinnut nalunaarutiginnissanik pisinermut atornerneqarput.

Tusagassiorfik Wavemaker 104,4 millionit koruuninnappoq.

DR-ip ilisimatuut Peqqinnissamut aqutsisoqarfiup qaammarsaanera 172 millionit koruuninillu akeqarnera akilersinnaasoq pillugu oqaloqatigai. 

Ilaasa qaammarsaanerit sunniuteqarneri inernileruminaatsikkaat Aarhus Universitetimi suliffeqarfimmi aqutsinermut immikkoortortaqarfimmi ilisimatuup Peqqinnisamut aqutsisoqarfik oqariartuuteqarnissamik iluatsitsilluarsimasoraa.

Inuit akiuussutissamik kapitinnissaat iluatsinneqarsimasoq attaveqaqatigiinnerlu tamatumani iluaqutaalluarsimasoq taassuma erseqqissaatigaa.