Peqqinnissamik nalunaarusiaq iluarisimaarneqarpoq
Peqqinnissaq pillugu nalunaarusiarsuaq ”Inuuneritta”-mik qulequtalik Inatsisartuni ullumi saqqummiunneqarpoq. Peqqissutsimut naalakkersuisoq Asii Chemnitz Narup tamatuminnga saqqummiussimmat partiinit tamanit isumaqatigineqarluarpoq.
Nalunaarusiaq saqqummiunneqartoq pillugu Siumut akerliliinerpaavoq. Siumumiit piumasarineqarpoq nalunaarusiaq inuttut eqqiluisaarnissaq pillugu paasisitsiniaanermik ilaqarsimasariaqaraluartoq. Taakku tunngavilersuipput, eqqiluisaannginneq TB-mik nappaateqalersarnermik pilersitsisartoq.
Taamatuttaaq Siumut isumaqarpoq, siunissami kommunit kattuppata PAARISA-p suliai kommuninit akisussaaffigineqalissasut.
Asii Chemnitz Narup-ip saqqummiussinermini oqaatigisaasa ilaat tassalu; nunatsinni imigassartorpallaarneq peqqinnissamut ajoqutaanerpaajusoq Demokraatinit isumaqatigineqarpoq. Demokraatiniittaaq ernummatigineqarpoq nunatsinni haship atugaavallaarnera. Taakku ujartorpaat haship atugaanera pillugu paasissutissanik tigussaanerusunik soorlu, qanoq annertutigisumik atugaanera pillugu misissuisoqartariaqartoq.
Atassutip aamma peqqinnissaq pillugu nalunaarusiarineqarsimasoq iluarisimaarpaat. Taakkuttaaq maqaasivaat nalunaarusiami kinguaassiutitigut piaarpallaamik atoqateqartarneq itinerusumik sammineqarsimassagaluartoq. Taakku erseqqissaatigaat inuusuttut suli 15-liisimanngitsut 48 procentii atoqateqareersimammata.
Kattusseqatigiit partiiata siunnersuutigaa, TB pillugu ikiuisoqarnerusariaqartoq, soorlu ilaatigut aqqusinerni qiserpassuit Kattusseqatigiit partiiata assersuutigaat.
Aammattaaaq ullup ingerlanerani Siumumiit siunnersuutigineqarpoq, inuit napparsimavinni namminersortuni suliaritittussat siunissami tapiiffigineqartalertariaqartut. Taakkuli taama siunnersuuteqarnerat naalakkersuisunit taperserneqanngilaq.
