Peqqarniiserniartuusorisanit tallimat iperagaapput
Odensemi tigusarinnittoqarallartillugu peqqarniisernissaraluit pinngitsoortinneqarsimagunartut politiit isertortumik paasiniaasartuisa nalunaarutigaat.
Uppernarsaatilli tutsuiginarpallaanngimmata tigusarineqartut arfineq-marluk ilaat tallimat iperagaapput, sinnerilu tigummigallagaasussanngortinneqarlutik.
Pinerluttulerisut pisortaata, Troels Ørting Jørgensenip, isertortumik paasiniaasartoqatigiit siusinaarlutik inunnik tigusarinnissimanerinik oqalunneq ilumuunnginnerarpaa:
- Uppernarsaatit piffissaagallartillugu naammammata pineqartut tigusaraavut, peqqarniisernissaraluillu taamaalilluta pinngitsoortillugit, Troels Ørting Jørgensen oqarpoq.
Peqqarniisernissaraluit qaqugu sumilu pilersaarutigineqarsimanersut politiinit ilisimaneqanngillat. Taamaattorli politiit tunngavissaqarluarlutik oqarput:
- Peqqarniisertarneq pillugu inatsit tunngavigalugu uppernarsaatissavut naammapput. Sumi qaqugulu pilersaaruteqarsimanersut apeqqutaatinngilarput,
pinerluttulerisoq, Troels Ørting Jørgensen, naggasiivoq.
