Peqqarniisaartutut pasisaasut eqqartuussivimmut sassartinneqarput

Angutit taakku pingasut Sverigemi najugaqarput, Kangia Qiterlermeersuullutilli. Ataaseq siusinnerusukkut peqqarniisaarniarluni pilersaaruteqarsimasutut pasisaareernikuusimavoq, svenskit aviisiat Expressen allappoq.

Angutit biilimik attartukkamut ilaallutik marlunngormat unnukkut Danmarkiliarput. Jyllands-Posten-imut Københavnimiittumut peqqarniisaarniarlutik pilersaarusiorsimasut, Danmrkimi politiit isertortumik paasiniaasartut PET isumaqarput. Saassussinissaq sioqqutilaarlugu tigusaapput.

Angutit eqqartuussivimmi apeqqutit apeqqutigineqartut akiumasimanngilaat. PET-lli svenskillu politiivisa isumannaallisaasut angutit piffissami sivisuumi nakkutigisimavaat. Paasissutissallu katersorsimasaat eqqartuussivimmi saqqummiunneqarput.

Angutit pingasut ippassaq tigusarineqarnerminni eqqarasuartaammik nipikillisaatitalimmik 72-inik imassalimmik illuinnarsiummillu 9 millimeterimik imassallu 36-t tigummiarsimavaat. Inatsit tunngaviusoq tunngavigalugu killisiuinermi ullumi tamakku saqqummiunneqarput.

Tamakku saniatigut politiit angutinut pingasunut uppernarsaataannik avammut saqqummiussisoqanngilaq. Eqqartuussisoq Elisabeth Michelsen aalajangermat eqqartuussineq matoqqasumik ingerlanneqassasoq. Tamannalu pivoq politiit suli paasiniaammata.

Tigusarineqartut sisamaat angutaavoq Irakimeersoq 26-nik ukiulik. Grevemi Københavnip kujataani ilaquttanilu najugaqarpoq.

Angut iperagaassasoq, PET DR Nyheder-imut oqarpoq. Politiilli suli pasivaat.