Peqqarniisaarniatut pasisanik sivisunerusumik tigumminninnissaq mianersoqqussutigaa.
Tuluit Nunaanni ukiut marluk matuma siornatigut imminut toqoriaatigaluni qaartartumeerisut ilaata uillarnera tuluit tv-atigut takutinneqarpoq. Taassuma politiit peqqarniisaarniatut pasisanik sivisunerusumik tigumminninnissamut pisinnaatitaaffeqalernerat mianersoqqussutigaa. Taanna misilittakkani tunngavigalugit oqaluppoq; tassami qaartartumeerinerit misissuiffigineqarneranni politiinit tigusarineqarsimavoq, oqaluttuaraalu pisuunnginnermi uppernarsineqarnissaata tungaanut pisuusutut misigisimasimalluni.
Londonimi ukiut marluk matuma siornatigut sisamanngornerup juulip ulluisa arfineq aappaata ullaava nalinginnaalluinnartumik inunnut amerlanernut aallartippoq.
Ullaap tungaani nalunaaqutaq qulingiluanngulersoq Londonimi qimuttuitsut aqqutaanni nunap iluatigoortuni qaartartoq siulleq qaartinneqarpoq. Kinguninngualu qaartartup aappaa qaartinneqarpoq, imminut toqoriaatigalutik qaartartumeerisut sisamaasut angajullersaannit 30-nik ukiulimmit qaartinneqarluni.
Taassuma nulianut naartusumut juulip arfineq aappaanni ullaaq taanna nalinginnaanngilluinnarpoq.
- Kanngusoqaanga, suummi tamarmik uannut qimaannarneqarput, arnaq taanna oqarpoq.
- Aamma pisimasut akuerisinnaanngilluinnarpakka, oqarpoq.
Taamaattorli arnap taassuma peqqarniisaarniatut pasisaasimasutut, ministeriunertaap Gordon Brownip pilersaarutimisut saqqummiussaa mianersoqqussutigaa.
Pilersaarummi ilaatigut politiit pisinnaatinniarneqarput peqqarniisaarniatut pasisanik unnerluutiginninngikkaluarlutik ullut 56-it angullugit tigumminnissinnaasunngorlugit, naak ullumikkut ullut 28-t killiliunneqarsimagaluartut.
- Allaanngilaq allamik uppernarsaasoqartinnagu pisuusutut eqqartuunneqareerluni. Tamanna unnerluussinertaqanngitsumik eqqartuussinertaqanngitsumillu pineqaatissiinerup assigaa.
Arnaq taanna Tuluit Nunaata oqaluttuarisaanerani nutaanerusumi peqqarniisaarniarneq pillugu suliassami nutaanerpaami misissuinermi parnaarussanut ilaasimavoq.
