Peqqarniisaarniat suliniaqatigiiffeqartut
Peqqarniisaarniat timmisartunik Tuluit Nunaanniit USA-liartut qaartitsinissaralui tuluit politiivisa ippassaq iliuuseqarnermikkut pinngitsoortippaat. Suliamik misissuisut nalunaarput timmisartunik qaartitsiniaraluit amerlasimaqisut; qaartartuliortartut suleqataasimapput, aningaaliisoqarsimavoq, aqutsitsoqarsimapput kiisalu nunani tamalaani peqqarniisaarniat suliniaqatigiiffeqarsimallutik.
Tuluit Nunaanni isertorlutik paasiniaasartoqatigiit qaammatini arfineq-pingasuni qaartartumeeriniaraluit ilaat malunnaarsaarlutik malinnaaffigisimavaat. Scotland Yardimi Tuluillu Nunaanni isertorlutik paasiniaasartoqatigiit piffissap sivitsoriartornerani malinnaaffigisatik qanoq pilersaaruteqarnersut paasisaqaleriartorput. Paasisatillu naapertorlugit Amerikami Pakistanimilu isertorlutik paasiniaasartoqatigiit suleqatigilersimavaat. Qaartartumeeriniarlutik pilersaarutillit arlallit Pakistanimit Tuluit Nunaannut nuunnerunngikkunik kingoqqisuupput.
Pakistanimi isertorlutik paasiniaasartoqatigiit nunaqqatitik Tuluit Nunaannut nuunnerit marluk allallu tallimat tigusarimmatigik pilertortumik paasiniaasartoqatigiit qanoq pilersaaruteqartoqarnersoq paasisaqarput. Pakistanimi tigusarineqartut pingasut marlunngormat qanoq pilersaaruteqarlutik oqaluttuarniariartut Pakistanimi politiit tuluit politiivinut nalunaaruteqarput. Nalunaaruteqartoqariaannartoq Tuluit Nunaanni 24-t tigusarineqartut, Pakistanimi aviisi The Nation taama allappoq.
Tuluit politiivisa paasisaat naapertorlugit timmisartumut ilaasussat qaartitassatik nassataminniitinniarsimavaat. Timmisartullu qulingiluaanngikkunik qulit qaartinneqarnissaat pilersaarutaalluni. Amerikami TV-eqarfiup tusarliuppaa aatsitassat assigiinngitsut marluk timmisartumi akuliuteriarlugit assiliiviup qaammaallanneratigut qaartitsisoqarnissaa aamma pilersaarutaasimagaluartoq.
Tuluit Nunaanni aningaaseriviup 19-t pakistanimiutut atillit kontoisa matusimaneri saqqummersimmagit kikkut tigusaasimanissaat eqqoriarneqarsinnaalerpoq. Tigusaasut marluk pinnagit sinneri 20-t sinnerlugit ukioqarput. Tuluillu politiivi nalunaarput tallimat suli tigusarineqarsimanngitsut.
