Peqqarniisaarniat sisamat tigusarineqarput

Pineqartumut atatillugu inuit sisamat tigusarineqarput, peqqarniisaarniarnermullu aalajangersakkat najoqqutaralugit unnerluutigineqarlutik. Taakkunannga inuit pingasut unnuaq Sverigimit tikissimapput.

Taakkunani ataaseq Tunesiamit kingoqqisuuvoq, ataaseq Libanonimiuulluni, ataatsip suminngaanneersuunera suli paasineqarani, sisamaallu Irakimiuuvoq Danmarkimut nunasinissaminik qinnuteqaateqarsimasoq.

Taakku tamarmik sisamaallutik musliminut ingasattajaarnianut sakkulersortunut ilaanerarlugit, politiit isertortumik paasiniaasartuinit oqaatigineqarput, nunanilu tamalaani peqqarniisaarniartartut suleqatigiiffiinut qanittumik suleqateqarneragaallutik, politiillu oqaatigaat qaartartumeerinerit ulluni qaninnerni pisussatut pilersaarutaagaluartut.

Politiit isertortumik paasiniaasartuisa pisortaata Jakob Scharffip tusagassiuutinut nalunaarummini oqaatigaa, peqqarniisaarniarluni saassussinissaraluaq pinngitsiarnerani pinngitsoortinneqartoq.

Politiit isumaqarput, peqqarniisaarniatut pasisat Københavnimi Jyllands Postenip aaqqissuisoqarfianut iseriarlutik, inuit tamaaniittut toqussinnaasatik sapinngisamik amerlanerpaat toqorassamaarsimagaluaraat.

Jyllands Postenimut peqqarniisaarniarnissamik pilersaarutit sulisunit uissuummissutigineqaqaat, sulisullu tamanna nikallungassutigigaat, pisortaaneq Lars Munk oqarpoq.

Inatsiseqarnermut ministeri Lars Barfoed oqarpoq, peqqarniisaarniarnernut atatillugu Danmark aatsaat taama ilungersunartigisumik naammattuugaqartoq, tamannali pissutigalugu qallunaat uivertariaqanngitsut aamma oqaatigalugu.