Peqqarniisaarniat pineqaatissinneqangaatsiartut
Bosniami Sarajevomi peqqarniisaarniaqataasimasutut pisuutinneqarluni, angut 21-nik ukiulik danskisut innuttaassuseqartoq Tyrkerinilli kingoqqisuusoq ukiuni 13-ini parnaarunneqartussanngorlugu pineqaatissinneqarpoq.
Svenskeq suleqatigalugu Bosniamik europamiluunniit nunani allani saassussinissamik pilersaaruteqarsimasutut pisuutinneqarpoq. Svenskeq suleqatigisimasaa ukiuni 15-ini parnaarussassanngortinneqarpoq.
Suliaq 2005-imi aallartippoq, taamani bosniamiut politiivisa qaartatut 20 kilo-t, videoliat qaartartuliornermullu ilitsersuutit inissiami Sarajevomiittumi nassaarmata. Videoliani ilaatigut oqariartuuteqarput, qaartartuliat nunanut assigiinngitsunut Irakimi Afghanistanimilu sakkutuuliisimasunut atorneqassasut.
Suliaq Glostrupimi inuusuttunik sisamanik peqqarniisaarniarnissamik pilersaaruteqarsimasunut tigusarinnissimanernut attuumassuteqarpoq.
Paasissutissat eqqartuussinermi saqqummiunneqartut, Glostrupimi inuusuttunut attuumassuteqartut oqaatigineqarpoq.
Danskeq Tyrkerinit kingoqqisuusoq, Københavnip eqqaani Avedøremi peroriartorsimavoq. Pineqaatissinneqartut tamarmik pinngitsuunerarput. Taakkununngalu illersuisuusut isumaqarput, eqqartuussisut nunarsuarmi nunanit assigiinngitsunit kimigiiserfigineqarsimanerarlugit, pineqaatissiinerit suliareqqitassanngortinniarpaat.
