Peqqarniisaarniartoqarnera Ahmed Akkarip annilaarutigaa
Danmarkimi Imamiusimasoq Ahmed Akkari, Københavnimi peqqarniisarniartoqareersoq, norgemiut aviisiannit Bergens Tidendemit apersorneqarluni taama oqarpoq.
Ahmed Akkarip, Narsami ullumi najugaqartup, Muhammedimik titartakkat nunani kangiani qiterlermiittuni sammineqarnissaat isumagisimavaa, taamatullu iliorsimanini kingorna atuakkiamini tamanut utoqqatsissutigisimallugu.
- Puussaariniarluta taamaaliorpugut. Danmarkip ikuallanneqarnissaa taamani kissaatigaarput, Bergens Tidendemut siorna taama oqaluttuarpoq.
Isummaminilli allanngortitsigami ilaatigullu iliuuserisimasani utoqqatsissutiginiarlugit atuakkamik saqqummersitsigami muslimeqatiminit peersitaavoq toqumillu sioorasaarneqartarluni.
Skandinaviami killiligaanani oqarsinnaatitaaneq eqqugaavoq
Siornatigut iliuuserisimasani illersorsinnaajunnaarlugit aalajangernermi kingorna qisuariaatigineqartut pissutigalugit, inuit allat isummaminnik saqqummiussinissaminnut tunuarsimaalernerannik kinguneqarsinnaanissaa maanna annilaangatigilerlugu aviisimut oqaluttuarpoq.
- Qanoq navianartiginera amerlasuut takusimassavaat. Tamannalu Skandinaviami pimmat assut ajuusaarnarpoq, inuimmi ataasiakkaatut kiffaanngissuseqarnerat pingaartinneqarpoq, inuillu sorsunnermit naqisimaneqarnermiillu qimaasimasut killiligaanatik oqarsinnaajunnaarput.
- Upperisaq naalakkersuinikkulluunniit isummersortaatsit apeqqutaatinnagit kialluunniit killilersugaanani oqarsinnaatitaanera illersorniarlugu atuakkiorpunga. Muslimit siunissami taamatut periarfissaqalernissaat aamma neriuutigaara, aviisimut oqarpoq.
Pisoq akuerimanagu nalunaaruteqartoqartariaqarpoq
Københavnimi peqqarniisaarniartoqarnera inuit pingasut inuunerannik akeqarpoq - taakkulu ilagaat toqutsisutut pasineqartoq 22-nik ukiulik Omar Abdel Hamid El-Hussein, taassumalu atugassiap quiassuaatiginnittartup Charlie Hebdop Parisimi januaarip qaammataani saassunneqarnera politiit naapertorlugit isumassarsiorfigisimasinnaavaa.
Islam islamisiornerlu illersorniarlugit saassussisoqarsimanera uppernarsarneqarpat muslimit qisuariaateqartariaqarput pisorlu akuerimanagu nalunaaruteqarlutik.
- Ersarissumik paasiuminartumillu oqaatigisariaqarpaat iliuutsit taamattut akuerineqarsinnaanngitsut, inuit inuunerat ataqqineqarnerussasoq, aammalu kikkut titartaappata naqitigaqarpataluunniit soqutiginagu, taakku pisinnaatitaaffii ataqqineqassammata, Akkari aviisimut taama oqarpoq.
Ilanngullugu oqaatigisariaqarpoq Danmarkimi muslimit suliniaqatigiiffiit arlallit sapaatit-akunnerata naanerani saassussisoqarnera akuerinagu maanna nalunaaruteqarsimammata.
