Peqqarniisaarniartartut akiorniarpaat

Danmarkimi naalakkersuisut Dansk Folkepartiillu peqqarniisaarniartartut upalungaarsimaffigineqarnerat 125 million koruuninik aningaasaliiffigeqqippaat.

Danmarkimi aningaasanut inatsimmi ukioq mannamut atuuttumi aningaasat immikkoortinneqarsimasut agguaanneqarput.

125 million koruunit amerlanersaat, 93 million koruunit, politiit isertortumik paasiniaasartoqatigiivinut immikkoortinneqarput. Upernassaq paasiniaasartoqatigiit qarasaasiaasa atortorissaarutaat pissutsinut malinnaatinneqarsimanngimmat nutaamik pisisoqarpoq, paasiniaasartoqatigiit toqqorsiviini paasissutissarpassuit qarasaasiamut ilioqqarneqarsinnaalerlutik. Paasissutissat taamaalillutik ajornannginnerusumik atorneqarsinnaalissasut, inatsisinik atortitsinermut ministeri Lene Espersen oqarpoq.

700.000 koruunit inuussutissanut ministereqarfimmut immikkoortinneqarput. Naggorissaatitut atorneqartartup, ammoniumnitratip qaartartuliornermi atorneqarsinnaassarnera peqqutigalugu nakkutilliinerulernermut atugassat.

15 million koruunit Danmarkimi napparsimmaviit upalungaarsimaffiini siniffiiit amerlisarneqarnissaannut immikkoortinneqarput. 16 million koruunit illersornissamut ministereqarfimmi sakkutuut isertortumik paasiniaasartoqatigiivinut qaartartuuiaasartunullu immikkoortinneqarlutik.

Qaartartuuiaatinut nutaanut sulisullu amerlanerulernissaannut aningaasat atorneqassasut qaartartuuiaasartut pisortaat major Poul Nedergaard oqarpoq.