Peqqarniisaarniarsimasut unnerluutigineqassapput

Angutit inuusuttut sisamat, Københavnip avataani Glostrupimeersut, angutinik marlunnik Bosniami parnaarussaaqqasunik peqateqarlutik peqqarniisaarniarlutik pilersaaruteqarsimasut, unnerluutigineqartussanngorput. Angutit taakku sisamat qaammatini qulini parnaarussaareerput.

Peqqarniisaarnermut tunngassutillit unnerluussummik kinguneqassanersut Danmarkimi Inatsinik atortitsinermut ministerimit aalajangerneqartarput, Inatsisinillu Danmarkimi ministeri, Lene Espersen, ullumi tassa taamaaliorpoq, naalagaaffiullu unnerluussisuata innersuussutaa malippaa.

Angutit pineqartut sisamat ilaat marluk ullumikkut 17-inik ukioqarput, ataaseq 20-nik ataaserlu 21-nik. Taakku politiinit siorna oktobarip ulluisa 27-ianni tigusaapput. Peqqarniisaarniarlutik pilersaaruteqarsorisat 25-t taamanikkut tigusaapput, amerlanerilli iperagaaqqereerlutik.

Angutit inuusuttut pineqartut sisamat, angutinut marlunnut, Bosniap illoqarfiisa pingaarnersaanni, Sarajevomi, parnaarussivimmiittunut attaveqarsimasutut maanna unnerluutigineqartussanngorput. Angutit Sarajevomi parnaarussaasut, inissiaminni karsini qaartartunik imalinni issiarusaaleruttortut taamanikkut tigusaapput. Allanik aamma sakkulisarsimapput qiterutinillu qaartartortalinnik, imminuutigaluni atorneqartartunik, aamma sanaaqarsimallutik. Tusatsiakkanut aamma ilaavoq, Glostrupimut atatillugu suliaq, Canadamut aamma attuumassuteqarunartoq, peqqarniisaartartuugunartut 17-it juunimi tigusaasimammata.