Tyskland-imi peqqarniisaarniartartuni Rote Arme Fraktion-imi siulersuisuusimasoq, Brigitte Mohnhaupt, ukiuni 24-ini parnaarussaareersimalluni unnuaq iperagaasoq, tyskit pisortaat nalunaarput.
Tyskland-imi nuimasunik 1970-ikkunni toqoraasarnerni, 57-nik ukiulik Brigitte Mohnhaupt peqataasarsimavoq.
Taannalu inunnik qulingluanik toqutsisimasutut tallimariarluni inuunini naallugu parnaarussassanngortinneqarluni pillarneqarsimagaluarpoq, maannali ukiut 24-iinnaat parnaarusimaneqareerluni iperagaavoq.
Arnap taassuma iperagaanera, eqqunngutsuunerarlugu uparuartorneqarsimavoq, minnerunngitsumik peqqarniisaarniaqatigiit, Rote Arme Fraktion-ip aaqqissugaanik toqutaasimasut ilaqutaanit.
Mohnhaupt-ip toqutsisarsimanini peqqissimissutigalugit oqartarsimanngilaq, pisortalli isumaqarput, peqqarniisaarniaasimasoq Brigitte Mohnhaupt avatangiisinut ulorianaataarussimasoq.