Peqqarniisaarnialersaartutut pasineqartut tigusaapput

Tuluit politiivisa muslimit arfineq-pingasut Tuluit Nunaanni najugallit peqqarniisaarnialersaartutut pasillugit tigusaraat.

Peqqarniisaarniaasorisat taakku arfineq-pingasut pilersaarutigisimavaat muslimeqatertik ataaseq tigusareriarlugu niaquerniarlugu, assingalu qarasaasiami internetsikkut takusassiariniarlugu.

Angutit taakku arfineq-pingasut tigummigallagassatut tigusarineqarput.

Tuluit TV-iata Sky-ip paasissutissiinera naapertorlugu, angut muslimiusoq tigusarilersaarneqaraluartoq niaquerniarneqarsimagaluartorlu tulunni sakkutuujusimavoq.

Sakkutoorli politiit maannakkut paaqqutarigaat oqaatigineqarpoq.

Angutit arfineq-pingasut sakkutuumik tigusarinninniarnerigaluat pilersaarusiorluagaasimavoq isumaasimagaluarporlu ullualunnguit qaangiuppata angut tigusarineqassasoq.

Piniarliiniaasorisatut tigusat al-Qaedakkormiut Irak-imi niaquiigaangamik niaqueeriaasiannut assingusumik pilersaarusiorsimagaluarput.