Peqqarniisaarnermut akiuiniat ornittagassartaalerput

Peqqarniisaartarnerup oqartussaasunit akiorniarneqarnera Danmarkimi nutaamik iliuuseqarfigineqarnialerpoq.

Peqqarniisaartarnermik Danmarkimi paasiniaasartut siunissami ataatsimoorfeqalissapput.

Paasissutissat isertuulluinnaqqissaakkat Illersornissamut qullersaqarfiup isertortumik paasiniaasartuinut, PET-mut, Upalungaarsimanissamut ataatsimiititaliamut, Nunanullu allanut ministeriaqarfimmut annguttartut, Peqqarniisaartarneq pillugu Misissueqqissaartartut Ornittagariligassaanni katersorneqartassasut, aviisi nutaaq, Danmarkimi akeqanngitsumik agguaanneqartalersoq, 24timer allappoq.

Illu ornittagaligassaq qaammatit sisamat qaangiuppata piariissagunarpoq, nalilersueqqissaartartullu 15-t tassani sulisuussapput.

Inatsisinik atortitsinermut Danmarkimi ministeri, Lene Espersen, Konservativineersoq, naapertorlugu, peqqarniisaartarneq pillugu akiuiniarnermut suliniutit pitsaanerusut Danmarkimi amigaatigineqarsimapput.

- Peqqarniisaarnianit sutigut tamatigut siulliunissarput pingaartittariaqarparput, Lene Espersen aviisimut 24tiimimut oqarpoq.