Peqatigiiffik Qajaq Aasianni aallarteqqippoq
Siornatigut Peqatigiiffik Qajaq Aasianni ilaasortaaniaraanni kalaallit qajaannik peqarnissaq piumasaqaataasimagaluarpoq, siulersuisunngortulli tamanna allanngortilersaarpaat.
- Isumaqarpugut tamakkiisumik ilaasortaasoqarsinnaasoq qajaqanngikkaluarluni. Taamaasilluta ilaasortat amerlanerit pissarsiarisinnaavagut aamma qaannat allat illoqarfitsinni atorneqarsinnaanerat periarfississinnaagatsigu. Siunertaraarput maani qajartornerup ingerlanneqarsinnaanissaa, siulittaasunngorallartoq Adam Hansen oqarpoq.
Siulittaasup saniatigut siulersuisuugallartut tassaapput Tom Koch Svennesen aningaaserisutut inissittoq siulersuisunilu ilaasortat José D. Ruiz-Martinez aamma Miki Hansen. Taakku peqatigiiffik uummarissaqqinniarlugu aalajangerput Aasiammiunut iluaqutissanngorlugu.
- Siunertarput pingaarneq tassaavoq kinngusaarnermut sungiusarnissamut periarfissinnissaat aammalu aallarterlaanut misileereernikunullu qajartortarnerup siuarsarnissaa. Aamma sulissutiginiarparput peqatigiiffiup illuutaata iluata iluarsaannissaa qaanniviliorlutalu. Inuit allanik isumassarsiaqarunik ataatsimeersuarnermut takkullutik saqqummiussinissamut tikilluaqusaapput, Adam Hansen oqarpoq, assullu qilanaarnerarluni kalaallit qajartortarnerat siuarsarniarlugu suliniarnerup aallarteqqinnissaa.