Peqatigiiffik nutaaq pilersinneqarpoq

Peqatigiiffik nutaaq pilersinneqarpoq, inuutissarsiummillu nutaamik pilersitserusuttut maanna saaffissaqalerput.

Peqatigiiffik nutaaq, qallunaatut ateqartoq Iværksætterforeningen Grønland, Nunatsinni inuutissarsiummik aallartisaaniartut peqatigiiffiat apriilip aappaani kujataani pilersinneqartoq maannamut marluinnarnik ilaasortaqarpoq, tassaappullu Brian Fencker, Qaqortoq aamma Bent B. Olesen, Narsaq.

- Inuutissarsiummik nutaamik aallartisaaniarnerup ilungersunarnerujussua qimakkiaartuaartariaqarpoq, peqatigiiffiup ilaasortaata aappaa, Bent B. Olesen, Radioavisimut oqarpoq.

Aallarnisaaniat sapinngisamik amerlasuut nunatsinni katersuuffeqalernissaat isumassarsisut peqatigiiffiliornerminni siunniuppaat. Neriuutigaalli nalinginnaasumik aappaagu ataatsimeersuartitsisinnaassallutik, peqatigiiffittaap nuna tamakkerlugu ilaasortaaffigineqarnissaa siunertaralugu..

Peqatigiiffiliornermi anguniarneqartunut ilaavoq aallarnisaanianut nittartakkamik aammaassinissaq, tassanilu oqallittarfimmik, ilisimasanik aallerfimmik, minnerunngitsumillu siunnersortikkumalluni saaffissamik pilersitsisoqarsinnaassalluni.

Inuutissarsiummik aallarnisaaniarneq nukittuumik ineriartortinneqassappat, kalaallillu taama isumassarsiullaqqitsiginerat eqqarsaatigalugu, ataatsimoorluni naapittarfiusinnaasumik amigaateqarpugut, Bent B. Olesen nassuiaavoq, taakkartorlugulu nittartakkamik pilersitsilluni tamanna anguneqarsinnaassasoq.

Brian Fencker-ip aamma Bent B. Olesen-ip inuutissarsiummik aallarnisaaniarnerminnik aningaasaliissutissanik pissarsiniarneq namminneerlutik misilittagaqarluarfigivaat, naak nunami maani inuutissarsiutinik nutaanik pilersitserusuttut pisortanit tapersersorneqarusullutillu piumaneqaraluartut, qanoq pisariutigalunilu ilungersunartigisinnaasoq, naluneqanngilaq.

Aallarnisaaniat peqatigiiffittaavata Iværksætterforeningen Grønlandip Danmarkimi Dansk Iværksætterforening qanimut suleqatigalugu ikiortiseraat, taamaalillutik suliffeqarfinnit ingerlatsivinnillu siunissami suleqatiserinninnissartik aamma angusinnaassagamikku.