Peqatigiiffik Kalaallit Meerartai qullersartaarpoq

Peqatigiiffik Kalaallit Meerartai nutaamik qullersartaarpoq. Qullersaasimasoq, Bente With, ukiuni sisamani sulereerluni aasaq tunuarmalli, atorfik taanna inuttaaruppoq.

Bente Withip nunatsinni meeqqat sumiginnagaasut pillugit oqaaseqartarnini Danmarkimi immikkut ittumik tusaamaneqaatigai.

- Danskit naalakkersuisuisa ataatsimoortumik tapiissutit aqqutigalugit nunatsinni meeqqat inuusuttullu ikiorserneqarnissaannut immikkoortitsisariaqartut Bente With Danmarks Radiomut ukioq kingulleq oqarpoq.

Bente With, naalakkersuinermik suliaqartuunani naalakkersuinermik suliaqartut suliassaannut akuliullunilusooq taama pimmat, Namminersornerullutik Oqartussanit iluarineqarpallaanngilaq.

Bente With sumik peqquteqarluni tunuarniuteqarsimanersoq, peqatigiiffiup siulittaasuata, Mads Thyregodip, itisilingilaa. Bente With, inuttut atukkani tunngavigalugit tunuarniuteqarsimasoq erseqqissarpaa, suleqatigiinnertillu unitsissimanerarlugu.

Mads Thyregodip ilanngullugu uppernarsarpaa qullersaasimasup oqaaseqaatigisimasai nunatsinni naalakkersuinermik suliaqartut akornanni aalassatsitsisimaqisut. Peqatigiiffik naalakkersuinermik suliallit suliassaannik suliaqarneq ajortoq Mads Thyregodip aamma erseqqissarpaa.

- Qullersatut atorfeqarluni naalakkersuinermik suliaqartutut sulisoqarsinnaanngilaq. Kalaallit Nunaata Danmarkillu akornanni pissutsit peqatigiiffimmit akuliuffigineqartussaanngillat, Mads Thyregod oqarpoq.

Peqatigiiffik Kalaallit Meerartai 1924-imiilli atulerpoq suliniuterpaaluillu peqatigiiffiup ulloq manna tikillugu suliuniutigereerpai; soorlu Kujataani Tunumilu ornittakkat.