Pensioni oqallisiginiarpaat
Qassinik ukioqarluta pensionisiaqartalissaagut. Pensionisiat qanoq amerlatigissappat imaluunnit qanoq ikitsigissappat – pensionisiallip aningaasat qanoq amerlatigisut pisariaqartippai.
Apeqqutit taama ittut akissutissartaat Inatsisartuni ilaasortanit ullumikkut eqqarsaatersuutigineqarunarput, pensionisialimmi aningaasatigut atugarisaat pillugit nassuiaat Inatsisartunit ualeru oqaluuserineqassammat.
Pensionisiaqalernissamut killissarititap ukiunik marlunnik sivitsorneqarnissaa, tassalu 63-inik ukioqarluni pensionisiaqalersinnaatitaanerup 65-inut allanngortinneqarsinnaanera Inatsisartunit tassuugunnguaq oqaluuserineqassaaq.
Inatsisartut upernaaq ataatsimiinnerminni suleqatigiissitaliortitsinissaq aalajangiuppaat, suleqatigiissimillu pilersitsinikkut pensionisiallit aningasatigut atugaasa misissuiffigineqarnissaat pitsanngorsaataasinnaasunillu siunnersuuteqarnissaat anguniarneqarpoq.
Suleqatigiissitap atorfilittanik inuttaqartup nassuiaataa 61-inik qupperneqartoq Ilaqutariinnermut Inatsisinillu Atortitsinermut Naalakkersuisup Aleqa Hammondip saqqummiutissavaa.
Suleqatigiissitallumi inassuteqaatai erseqqipput, tassalu pensionisiaqalersinnaanerup ukiunik 63-init 65-inut qaffanneqarnissaa siunnersuutigineqarmat. Tamatumunnga tunngavilersuutigineqartut ilagaat, 63-ileereersimasut ukioq 2015-ip tungaanut 1500-inik amerlinissaat ilimagineqarmat, tamatumalu malitsigisaanik aningaasartuutit ullumikkornit naleqqiullugit 40 %-ingajammik amerlinissaat naatsorsorneqarsimavoq.
Utoqqarnut pensionisiaqartitsinermi siusinaartumillu pensionisiaqartitsinermi malittarisassat avissaartinneqarnissaat suleqatigiissitap aamma inassutigaa. Taamatuttaaq pensionisiallit atugaasa pitsanngorsarnissaat siunertaralugu pensionisiaqartitsisarnermi periuseq qanoq ittoq atorneqassanersoq Inatsisartunit isummerfigineqassaaq.
Suleqatigiissitap periutsit pingasut misissorsimavai, aningaasatigullu qanoq naleqassanersut minnerunngitsumillu pensionisiat qanoq qaffanneqarsinnaanersut naatsorsorsimavaat. Qinikkalli periuseq sorleq atussanerlugu isummerfigissavaat, sorliussanersorlu ualeru oqallinnermi paasinarsissaaq.
