PCB pillugu aasaq qaangiuppat ataatsimiittoqassaaq
Illorsuarmi ingutsikkami ima PCB-qartigaaq, allaat Blok R-ip aamma S-ip ingutsernerani upernaaq apriilimi piiakkat 1000 kubikmeterisut angitigisut, Nuup Erngup eqqaanut eqqakkat piiarneqartariaqarlutik.
Nuummi taama paasisaqarnermi, Nunatta sinnerani inissianik 1960-ikkunni 1970-ikkunnilu sanaartornermi PCB qanoq atugaatigisimanersoq apeqqutissanngorpoq. Kisianni tamanna maannakkut akineqarsinnaanngitsoq nalunaarusiami oqaatigineqarpoq. PCB-lli nunani allarpassuarnisut sanaartornermi atortuni akugineqartarsimassasoq ilimanarpoq. Teknikikkut atoruminartuunini pissutigalugu assersuutigalugu betonimi, kiffiutissani qalipaammilu atorneqartarsimavoq.
Kiisianni akuutissat allat atoruminartut assigalugit PCB akuutissatut avatangiisinut navianartutut atoqqusaajunnaarnikuuvoq. Akuutissanut allanut 21-nut ilaalluni allattukkanut, peqqinnissamut navianartutut isigineqartunut, ilaavoq. Allattukkanut ilaasut ilaat kræfteqalissutaasartutut, ilaat kinguaassiorsinnaassutsimut sunniisartutut aammalu inuit uumasullu pissusilersortarnerannik sunniisartutut isigineqarlutik.
Kisianni PCB-it qanoq navianartiginersut immikkut ilisimasalinnit qularnaatsumik oqaatigiuminaatsinneqarpoq. Blok Q pillugu nalunaarusiortoq, COWI-meersoq Anne Lise Nielsen, oqarpoq, apeqqut akiuminaatsuusoq, PCB-it assigiinngitsut qanoq angitigisut akuunersut apeqqutaammata. Kisianni nalunanngilaq, PCB arriitsumik arrortarmat, aammalu silaannaq imerlu aqqutigalugit siaruassinnaammat. Taamaalillutillu aamma nunami immamilu nerisaqatigiinni akuuneri alliartorsinnaallutik.
Anne Lise Nielsen Radioavisimut oqarpoq, Blok Q pillugu nalunaarusiornermini taamaallaat
suliassarisimallugu, PCB-p siaruaannissaa pinaveersimatinniarlugu nunani tamalaani malittarisassat naapertorlugit ingutsikkanit eqqakkat eqqaavinni qanoq isumagineqarsinnaanersut.
Nunatsinni sanaartukkani PCB qanoq atugaatigisimanersoq maanna ilisimaneqanngilaq. Kisianni aasaanerani sulinngiffik qaangiuteriarpat, naalakkersuisoqarfimmi ataatsimiinnermi ajornartorsiutit PCB-mut tunngasut sammineqassapput. Aamma siunnertaavoq, PCB-ip qanoq atugaatigisimanera peqqinnissamullu qanoq navianartiginera eqqarsaatigalugit tassani ataatsimiinermi iliuusissatut pilersaarusiorneqassasut.
